കൊച്ചി: പാലാരിവട്ടത്തെ ലേഡീസ് ഹോസ്റ്റലിൽ അതിക്രമിച്ച് കയറി യുവതിയെ പീഡിപ്പിക്കാൻ ശ്രമിച്ച കേസിൽ പ്രതിയെ പൊലിസ് അറസ്റ്റ് ചെയ്തു. ആലപ്പുഴ കാട്ടൂർ കോയിൽപറമ്പിൽ വീട്ടിൽ റോബിൻ ദാസ് (39) ആണ് പാലാരിവട്ടം പൊലിസിന്റെ പിടിയിലായത്. ഇയാൾ നിലവിൽ ആലുവ കുഴിവേലിപ്പടി ഭാഗത്ത് വാടകയ്ക്ക് താമസിച്ച് വരികയായിരുന്നു.

കഴിഞ്ഞ മെയ് 12-ന് പുലർച്ചെ നാല് മണിയോടെയാണ് നാടിനെ നടുക്കിയ സംഭവം നടന്നത്. പാലാരിവട്ടം മെട്രോ സ്റ്റേഷന് സമീപം പ്രവർത്തിക്കുന്ന ലേഡീസ് ഹോസ്റ്റലിലാണ് പ്രതി അതിക്രമിച്ചു കയറിയത്. ഹോസ്റ്റൽ മുറിയിൽ ഉറങ്ങിക്കിടക്കുകയായിരുന്ന യുവതിയെ പ്രതി മാരകമായി ഉപദ്രവിക്കാനും പീഡിപ്പിക്കാനും ശ്രമിക്കുകയായിരുന്നുവെന്ന് പൊലിസ് വ്യക്തമാക്കി.

സിസിടിവി ദൃശ്യങ്ങൾ നിർണായകമായി

പ്രതിയുടെ അപ്രതീക്ഷിത ആക്രമണത്തിൽ പരിഭ്രാന്തയായ യുവതി ഉച്ചത്തിൽ ബഹളം വെച്ചതോടെയാണ് വലിയൊരു ദുരന്തം ഒഴിവായത്. ഹോസ്റ്റലിലെ മറ്റ് അന്തേവാസികൾ ഉണരുമെന്ന് ഭയന്ന പ്രതി ഉടൻ തന്നെ സംഭവസ്ഥലത്തു നിന്നും ഓടി രക്ഷപ്പെടുകയായിരുന്നു.

തുടർന്ന് യുവതി നൽകിയ പരാതിയുടെ അടിസ്ഥാനത്തിൽ പാലാരിവട്ടം പൊലിസ് അടിയന്തരമായി കേസെടുത്ത് അന്വേഷണം ആരംഭിച്ചു. ഹോസ്റ്റലിലെയും മെട്രോ സ്റ്റേഷൻ പരിസരത്തെയും നിരവധി സിസിടിവി ദൃശ്യങ്ങൾ പൊലിസ് വിശദമായി പരിശോധിച്ചു. ഈ പരിശോധനയിലാണ് പ്രതിയെക്കുറിച്ചുള്ള കൃത്യമായ സൂചന ലഭിച്ചതും തുടർന്ന് ഒളിത്താവളത്തിൽ നിന്ന് ഇയാളെ വലയിലാക്കിയതും. അറസ്റ്റ് രേഖപ്പെടുത്തിയ ശേഷം പ്രതിയെ കോടതിയിൽ ഹാജരാക്കി റിമാൻഡ് ചെയ്തു. ഹോസ്റ്റലുകളിലെ സുരക്ഷയെക്കുറിച്ച് വീണ്ടും ആശങ്ക ഉയർത്തുന്നതാണ് ഈ സംഭവം.