വാഷിംഗ്ടൺ: ഇസ്റാഈലും ലെബനനും തമ്മിലുള്ള സംഘർഷത്തിന് താൽക്കാലിക വിരാമം. ലെബനൻ പ്രസിഡന്റ് ജോസഫ് ഔനും ഇസ്റാഈൽ പ്രധാനമന്ത്രി ബെഞ്ചമിൻ നെതന്യാഹുവും 10 ദിവസത്തെ വെടിനിർത്തലിന് സമ്മതിച്ചതായി പ്രസിഡന്റ് ഡൊണാൾഡ് ട്രംപ് ഔദ്യോഗികമായി അറിയിച്ചു. വ്യാഴാഴ്ച രാവിലെ തന്റെ സോഷ്യൽ മീഡിയ പ്ലാറ്റ്‌ഫോമായ 'ട്രൂത്ത് സോഷ്യലിലൂടെയാണ്' (Truth Social) ട്രംപ് ഈ നിർണ്ണായക പ്രഖ്യാപനം നടത്തിയത്.

സമാധാന നീക്കം ഇങ്ങനെ:

ഇന്നു വൈകുന്നേരം (EDT) 5 മണി മുതൽ വെടിനിർത്തൽ പ്രാബല്യത്തിൽ വരും.ട്രംപിന്റെ മധ്യസ്ഥതയിലുള്ള ചർച്ചകൾക്കൊടുവിലാണ് ഇരു രാജ്യങ്ങളും ആക്രമണങ്ങൾ നിർത്തിവെക്കാൻ തയ്യാറായത്.ഇറാനും അമേരിക്കയും തമ്മിലുള്ള സമാധാന ചർച്ചകൾക്ക് ആതിഥേയത്വം വഹിക്കുന്ന പാകിസ്താൻ, ലെബനനിൽ സമാധാനം പുനഃസ്ഥാപിക്കാതെ ചർച്ചകൾ മുന്നോട്ട് കൊണ്ടുപോകാനാവില്ലെന്ന് നിലപാടെടുത്തിരുന്നു. ഇതിന് പിന്നാലെയാണ് ട്രംപിന്റെ ഇടപെടൽ.

സംഘർഷത്തിന്റെ പശ്ചാത്തലം

ഇറാനെതിരായ  ഇസ്റാഈൽ വ്യോമാക്രമണത്തിന് ശേഷം ലെബനനിലെ രാഷ്ട്രീയ പാർട്ടിയും സായുധ ഗ്രൂപ്പുമായ ഹിസ്ബുള്ളയുമായി  ഇസ്റാഈൽ അതിരൂക്ഷമായ യുദ്ധത്തിൽ ഏർപ്പെട്ടു വരികയായിരുന്നു. കഴിഞ്ഞ കുറച്ചു മാസങ്ങളായി ആയിരക്കണക്കിന് പേർക്കാണ് അതിർത്തി മേഖലകളിൽ ജീവൻ നഷ്ടമായത്.

വഴിത്തിരിവാകുന്ന സമാധാന ചർച്ചകൾ

ട്രംപുമായി ചേർന്ന് സമാധാന നീക്കങ്ങൾ നടത്താൻ ലെബനൻ താൽപ്പര്യം പ്രകടിപ്പിച്ചിരുന്നതായി റോയിട്ടേഴ്‌സ് റിപ്പോർട്ട് ചെയ്യുന്നു. 10 ദിവസത്തെ ഈ താൽക്കാലിക വെടിനിർത്തൽ വിജയിച്ചാൽ മേഖലയിൽ സ്ഥിരമായ സമാധാനം കൊണ്ടുവരാൻ സാധിക്കുമെന്നും ഇറാനുമായുള്ള നയതന്ത്ര ബന്ധം പുനഃസ്ഥാപിക്കാൻ ഇത് സഹായിക്കുമെന്നും അമേരിക്ക പ്രതീക്ഷിക്കുന്നു.