ആലപ്പുഴ: ആലപ്പുഴ ചെങ്ങന്നൂരില്‍ വയോധികന്റെ മൃതദേഹം പുറത്തെടുത്ത് പോസ്റ്റ്‌മോര്‍ട്ടം ചെയ്യാന്‍ കോടതി ഉത്തരവ്.പുലിയൂര്‍ സ്വദേശി യേശുദാസിന്റെ മൃതദേഹമാണ് വീണ്ടും പോസ്റ്റ്‌മോര്‍ട്ടം ചെയ്യുന്നത്. യേശുദാസിന്റെ മരണത്തില്‍ ദുരൂഹതയുണ്ടെന്ന പരാതിയുമായി മകളും മരുമകളും രംഗത്തെത്തിയതോടെയാണ് ദുരൂഹത നീക്കാന്‍ ശവക്കല്ലറ തുറന്ന് പോസ്റ്റുമോര്‍ട്ടം നടത്താന്‍ ചെങ്ങന്നൂര്‍ സബ് ഡിവിഷണല്‍ മജിസ്‌ട്രേറ്റ് കോടതി ഉത്തരവിട്ടത്. 

ഇക്കഴിഞ്ഞ മാര്‍ച്ച് 24നാണ് പുലിയൂര്‍ ഓര്‍ത്തഡോക്‌സ് പള്ളിയില്‍ യേശുദാസിന്റെ സംസ്‌കാരം നടന്നത്.പിന്നാലെ മരണത്തില്‍ ദുരൂഹത ആരോപിച്ച് മകളും  മരുമകളും പരാതി നല്‍കുകയായിരുന്നു. 

ഹോം നേഴ്‌സ് വീട്ടില്‍ വച്ച് നല്‍കിയ കേക്ക് കഴിച്ചതിനെ തുടര്‍ന്ന് യേശുദാസ് ബോധരഹിതനായെന്നും പിന്നാലെയാണ് മരണം സംഭവിച്ചതെന്നുമാണ് പരാതിയില്‍ പറയുന്നത്. കൂടാതെ യേശുദാസിന്റെ സ്വത്തുക്കള്‍ സഹോദരന്‍ ഗബ്രിയേല്‍ മാമന്റെ പേരിലേക്ക് മാറ്റിയതും സംശയങ്ങള്‍ വര്‍ധിപ്പിച്ചു. കുടുംബം നല്‍കിയ പരാതിയില്‍ ചെങ്ങന്നൂര്‍ പൊലിസും അന്വേഷണം നടത്തുന്നുണ്ട്. 

പരാതിയുടെ അടിസ്ഥാനത്തില്‍ മൃതദേഹം ചൊവ്വാഴ്ച്ച രാവിലെ കല്ലറയില്‍ നിന്നും പുറത്തെടുക്കാനാണ് കോടതി നിര്‍ദ്ദേശം. ചെങ്ങന്നൂര്‍ തഹസില്‍ദാരുടെ മേല്‍നോട്ടത്തിലാണ് നടപടികള്‍ പൂര്‍ത്തിയാക്കുക. 

In a suspicious elderly death case, the court has ordered the exhumation of the body for a second postmortem examination. The directive comes amid concerns over the initial findings and aims to ensure a thorough forensic investigation.