അബുദബി: യുഎഇയിലെ സർക്കാർ ആരോഗ്യ മേഖലയിൽ വിപ്ലവകരമായ മാറ്റം വരുത്തിക്കൊണ്ട്, രാജ്യവ്യാപകമായുള്ള തങ്ങളുടെ എല്ലാ ആശുപത്രികളിലും ക്ലിനിക്കുകളിലും ആരോഗ്യ ഇൻഷുറൻസ് സ്വീകരിക്കുമെന്ന് എമിറേറ്റ്സ് ഹെൽത്ത് സർവീസസ്. 20-ലധികം പ്രമുഖ ഇൻഷുറൻസ് കമ്പനികളുമായി കരാർ ഒപ്പിട്ടതോടെയാണ് പൗരന്മാർക്കും താമസക്കാർക്കും സർക്കാർ ആരോഗ്യ കേന്ദ്രങ്ങളിൽ കൂടുതൽ എളുപ്പത്തിൽ ചികിത്സ ലഭ്യമാകുന്നത്.

ദുബൈ മുതൽ ഫുജൈറ വരെയുള്ള EHS-ന് കീഴിലുള്ള 17 ആശുപത്രികളിലും 61 പ്രാഥമിക ആരോഗ്യ കേന്ദ്രങ്ങളിലും പുതിയ സംവിധാനം നിലവിൽ വന്നു. നേരത്തെ ഇൻഷുറൻസ് സേവനങ്ങൾ പരിമിതമായ ദാതാക്കളിൽ മാത്രമായി ഒതുങ്ങിയിരുന്നെങ്കിൽ, പുതിയ മാറ്റത്തിലൂടെ കൂടുതൽ ഇൻഷുറൻസ് കമ്പനികളുടെ ഉപഭോക്താക്കൾക്ക് സർക്കാർ സൗകര്യങ്ങൾ ഉപയോഗപ്പെടുത്താം.

ALSO READ: ദുബൈ മെട്രോ 'ഗോൾഡ് ലൈൻ' പ്രഖ്യാപിച്ച് ശൈഖ് മുഹമ്മദ്‌; ഒരുങ്ങുന്നത് 34 ബില്യൺ ദിർഹത്തിന്റെ പദ്ധതി

എമിറേറ്റ്സ് ഐഡി ഉപയോഗിക്കാം: ഹെൽത്ത് കാർഡുകൾക്ക് പകരം എമിറേറ്റ്സ് ഐഡി ഉപയോഗിച്ച് തന്നെ ചികിത്സാ സേവനങ്ങളും ഇൻഷുറൻസ് നടപടികളും ആക്സസ് ചെയ്യാം.

ഓട്ടോമേറ്റഡ് സിസ്റ്റം: ഇൻഷുറൻസ് അംഗീകാരങ്ങൾക്കായി നൂതന ഐടി സംവിധാനങ്ങളാണ് ഏർപ്പെടുത്തിയിരിക്കുന്നത്. മിനിറ്റുകൾക്കുള്ളിൽ തന്നെ ക്ലെയിമുകൾക്കും മറ്റും അംഗീകാരം ലഭിക്കുന്നത് കാത്തിരിപ്പ് സമയം ഗണ്യമായി കുറയ്ക്കും. 

രോഗികളുടെ അനുഭവം മെച്ചപ്പെടുത്തുന്നതിനായി മൂന്ന് പുതിയ ഡിജിറ്റൽ സേവനങ്ങളും EHS ആരംഭിച്ചു:

ഡിജിറ്റൽ അപ്പോയിന്റ്മെന്റ്: ഇലാസ്റ്റോഗ്രാഫി ഇമേജിംഗ് (Elastography imaging) പോലുള്ള പരിശോധനകൾക്ക് നേരിട്ട് പോകാതെ തന്നെ ഡിജിറ്റൽ ചാനലുകൾ വഴി ബുക്ക് ചെയ്യാം.

വെർച്വൽ കൺസൾട്ടേഷൻ: സാംക്രമിക രോഗങ്ങളുമായി ബന്ധപ്പെട്ട സേവനങ്ങൾക്ക് വീഡിയോ കൺസൾട്ടേഷൻ വഴി വിദൂര ചികിത്സാ സഹായം തേടാം.

ഡിജിറ്റൽ മെഡിക്കൽ റിപ്പോർട്ട്: പ്രാഥമികാരോഗ്യ കേന്ദ്രങ്ങളിലെ സന്ദർശനത്തിന് ശേഷം ഓൺലൈനായി മെഡിക്കൽ റിപ്പോർട്ടുകൾക്ക് അപേക്ഷിക്കാം.

പൊതുജനാരോഗ്യ മേഖലയുടെ കാര്യക്ഷമത വർദ്ധിപ്പിക്കാനും സ്വകാര്യ ആശുപത്രികളോട് കിടപിടിക്കുന്ന സേവനം ഉറപ്പാക്കാനുമാണ് ഈ സംരംഭത്തിലൂടെ ലക്ഷ്യമിടുന്നതെന്ന് എമിറേറ്റ്സ് ഹെൽത്ത് സർവീസസ് വ്യക്തമാക്കി.

uae government hospitals will now accept health insurance, according to emirates health services. the move aims to improve healthcare accessibility, reduce patient costs, and enhance service efficiency while supporting broader healthcare reforms across the united arab emirates.