ബെംഗളൂരു: ഐപിഎൽ ചരിത്രത്തിന്റെ താളുകളിൽ സ്വന്തം പേര് സ്വർണ്ണലിപികളാൽ എഴുതിച്ചേർത്ത് ഗുജറാത്ത് ടൈറ്റൻസ് താരം സായ് സുദർശൻ. റോയൽ ചലഞ്ചേഴ്സ് ബെംഗളൂരുവിനെതിരായ മത്സരത്തിൽ തകർപ്പൻ സെഞ്ച്വറി നേടിയ താരം, ഐപിഎല്ലിൽ ഏറ്റവും വേഗത്തിൽ 2000 റൺസ് തികയ്ക്കുന്ന ബാറ്റ്സ്മാൻ എന്ന റെക്കോർഡും സ്വന്തമാക്കി. ഇതിഹാസ താരം ക്രിസ് ഗെയ്‌ലിന്റെ വർഷങ്ങൾ പഴക്കമുള്ള റെക്കോർഡാണ് ചിന്നസ്വാമി സ്റ്റേഡിയത്തിൽ സായ് സുദർശൻ തകർത്തത്.

First Indian to score hundreds in 3 consecutive season. Mr. Consistent for a reason 😌 pic.twitter.com/xCXBAHNIVK

— Gujarat Titans (@gujarat_titans) April 24, 2026

ചിന്നസ്വാമിയിൽ സെഞ്ച്വറി തിളക്കം

ടോസ് നഷ്ടപ്പെട്ട് ബാറ്റിംഗിനിറങ്ങിയ ഗുജറാത്തിനായി സായ് സുദർശൻ വിസ്മയകരമായ പ്രകടനമാണ് കാഴ്ചവെച്ചത്. 58 പന്തിൽ നിന്ന് 100 റൺസ് തികച്ച താരത്തിന്റെ ഇന്നിംഗ്‌സിൽ 11 ഫോറുകളും 5 സിക്‌സറുകളും ഉൾപ്പെടുന്നു. സായ് സുദർശന്റെ ഐപിഎൽ കരിയറിലെ മൂന്നാം സെഞ്ച്വറിയാണിത്.

ഗെയ്‌ലിനെ വെട്ടി സായ്; റെക്കോർഡുകളുടെ തമ്പുരാൻ

കേവലം 47 ഇന്നിംഗ്‌സുകളിൽ നിന്നാണ് സായ് സുദർശൻ 2000 റൺസ് എന്ന നാഴികക്കല്ല് പിന്നിട്ടത്. ഇതോടെ 48 ഇന്നിംഗ്‌സുകളിൽ നിന്ന് ഈ നേട്ടം കൈവരിച്ച വെസ്റ്റ് ഇൻഡീസ് കരുത്തൻ ക്രിസ് ഗെയ്‌ൽ രണ്ടാം സ്ഥാനത്തേക്ക് പിന്തള്ളപ്പെട്ടു. ഇതിഹാസ താരം സച്ചിൻ ടെണ്ടുൽക്കർ (63 ഇന്നിംഗ്‌സ്), നിലവിലെ ചെന്നൈ നായകൻ ഋതുരാജ് ഗെയ്‌ക്‌വാദ് (57 ഇന്നിംഗ്‌സ്) എന്നിവരെല്ലാം സായ്ക്ക് ഏറെ പിന്നിലായി.

ഐപിഎല്ലിൽ ഏറ്റവും വേഗത്തിൽ 2000 റൺസ് തികച്ചവർ 

1. സായ് സുദർശൻ 47 ഇന്നിംഗ്‌സ്
2. ക്രിസ് ഗെയ്‌ൽ    48 ഇന്നിംഗ്‌സ്
3. ഷോൺ മാർഷ്    52 ഇന്നിംഗ്‌സ്
4.  ഋതുരാജ് ഗെയ്‌ക്‌വാദ് 57 ഇന്നിംഗ്‌സ്
5. കെ.എൽ രാഹുൽ 60 ഇന്നിംഗ്‌സ്
6. യശ്വസി ജെയ്‌സ്വാൾ 62 ഇന്നിംഗ്‌സ്
7. സച്ചിൻ ടെണ്ടുൽക്കർ 63 ഇന്നിംഗ്‌സ്

സ്ഥിരതയാർന്ന പ്രകടനത്തിലൂടെ ഐപിഎല്ലിലെ വിശ്വസ്തനായ ബാറ്ററായി മാറിക്കഴിഞ്ഞ സായ് സുദർശൻ, വരാനിരിക്കുന്ന ടി20 ലോകകപ്പിലേക്കുള്ള ഇന്ത്യൻ ടീം സെലക്ടർമാരുടെ വാതിലിലും ഈ പ്രകടനത്തിലൂടെ ശക്തമായി മുട്ടുകയാണ്.

ഗുജറാത്ത് ടൈറ്റന്‍സ് പ്ലെയിങ് ഇലവന്‍ 

സായ് സുദര്‍ശന്‍, ശുഭ്മാന്‍ ഗില്‍ (ക്യാപ്റ്റന്‍), ജോസ് ബട്‌ലര്‍ (വിക്കറ്റ് കീപ്പര്‍) വാഷിങ്ടണ്‍ സുന്ദര്‍, ഷാരൂഖ് ഖാന്‍, ജേസണ്‍ ഹോള്‍ഡര്‍, രാഹുല്‍ തിവാട്ടിയ, റാഷിദ് ഖാന്‍, മാനവ് സുതാര്‍, കഗിസോ റബാദ, മുഹമ്മദ് സിറാജ്. 

റോയല്‍ ചലഞ്ചേഴ്സ് ബെംഗളൂരു പ്ലെയിങ് ഇലവന്‍ 

വിരാട് കോഹ്ലി, ദേവദത്ത് പടിക്കല്‍, രജത് പടിദാര്‍ (ക്യാപ്റ്റന്‍), ജിതേഷ് ശര്‍മ്മ (വിക്കറ്റ് കീപ്പര്‍), ടിം ഡേവിഡ്, റൊമാരിയോ ഷെപ്പേര്‍ഡ്, കൃണാല്‍ പാണ്ഡ്യ, ഭുവനേശ്വര്‍ കുമാര്‍, ജോഷ് ഹേസല്‍വുഡ്, സുയാഷ് ശര്‍മ, റാസിഖ് സലാം ദാര്‍.