പുതുപ്പള്ളി: പുതുപ്പള്ളിക്കാരുടെ സ്വന്തം കുഞ്ഞൂഞ്ഞിന്റെ മകനേയും കൊവിട്ടില്ല ആ നാട്. കിടുക്കന്‍ ജയമങ്ങ് നല്‍കി. വിജയം ഉറപ്പിച്ചിരിക്കേ പിതാവിന്റെ ഓര്‍മകള്‍ ചേര്‍ത്തു വെച്ചാണ് ചാണ്ടി ഉമ്മന്‍ ഫേസ് ബുക്കില്‍ പോസ്റ്റിട്ടത്.

'നമ്മള്‍ ജയിച്ചു അപ്പ...' പറയാനുള്ളതെല്ലാം ഒറ്റവാക്യത്തില്‍ അദ്ദേഹം കുറിച്ചു. 

നിയമസഭാ തിരഞ്ഞെടുപ്പില്‍ വ്യത്യസ്തമായ പ്രചാരണമായിരുന്നു ചാണ്ടി ഉമ്മന്റേത്. പിതാവിനെ പോലെ തന്നെ സാധാരണക്കാരില്‍ സാധാരണക്കാരനായി അദ്ദേഹം ജനങ്ങളിലേക്കിറങ്ങി. സൈക്കിളില്‍ പോയി വോട്ട് ചോദിക്കുന്ന ചാണ്ടി ഉമ്മനെയാണ് ജനം തെരെഞ്ഞെടുപ്പ് പ്രചാരണത്തിന്റെ സമയമത് കണ്ടത്.
ഫ്‌ളക്സ് ബോര്‍ഡുകള്‍ ഒഴിവാക്കി.  കൊട്ടിക്കലാശം മാറ്റിവച്ചു. 

ഓരോ മണ്ഡലത്തിലും പല സ്ഥാനാര്‍ഥികളും കോടികള്‍ ചെലവഴിച്ചപ്പോള്‍ ആര്‍ഭാടമുള്ള ചെലവുകള്‍ ഒഴിവാക്കി. മാത്രമല്ല ആ തുക പാവപ്പെട്ടവര്‍ക്ക് വീടുകള്‍ വച്ചു കൊടുക്കാന്‍ ഉപയോഗിക്കുമെന്നും അദ്ദേഹം വ്യക്തമാക്കി. 

ആകെ 15 റൗണ്ടുകളില്‍ ആറ് റൗണ്ടുകള്‍ വോട്ടെണ്ണി തീര്‍ത്തപ്പോള്‍ തന്നെ ചാണ്ടി ഉമ്മന്‍ 21691 വോട്ടിന്റെ കൂറ്റന്‍ ലീഡ് നിലയിലേക്ക് എത്തിയിരുന്നു.

അരനൂറ്റാണ്ടുകാലം ഉമ്മന്‍ ചാണ്ടി എന്ന ഒരേയൊരു നേതാവിനെ മാത്രം നിയമസഭയിലേക്ക് അയച്ച മണ്ഡലമാണിത്. 1970 മുതല്‍ 2023 വരെ തുടര്‍ച്ചയായി 53 വര്‍ഷമാണ് ഉമ്മന്‍ ചാണ്ടി പുതുപ്പള്ളി മണ്ഡലത്തെ പ്രതിനിധീകരിച്ചത്. കേരള രാഷ്ട്രീയത്തിന്റെ ചരിത്രത്തില്‍ ഒരു മണ്ഡലത്തില്‍ നിന്ന് ഇത്രയധികം കാലം ജയിച്ച മറ്റൊരു നേതാവില്ല.  2023ല്‍ അദ്ദേഹത്തിന്റെ വേര്‍പാടിനെത്തുടര്‍ന്ന് നടന്ന ഉപതിരഞ്ഞെടുപ്പിലൂടെ മകന്‍ ചാണ്ടി ഉമ്മനെ പുതുപ്പള്ളി ഏറ്റെടുത്തു.