തിരുവനന്തപുരം: പിഎസ്‌സി പരീക്ഷയിൽ ഗൂഗിൾ ജെമിനി ഉപയോഗിച്ച് ഹൈടെക് രീതിയിൽ കോപ്പിയടിച്ച ഉദ്യോഗാർത്ഥിയും സഹായിയും പിടിയിൽ. മുല്ലൂർ സ്വദേശി അനീഷ് ബാബു (27), സഹായിയായ വിഴിഞ്ഞം പനവിള സ്വദേശി അരുൺ (28) എന്നിവരാണ് ഫോർട്ട് പൊലിസിന്റെ പിടിയിലായത്. തിരുവനന്തപുരം കാലടി ഗവ. എച്ച്എസ് സ്‌കൂളിൽ നടന്ന ബീറ്റ് ഫോറസ്റ്റ് ഓഫീസർ പരീക്ഷയ്ക്കിടെയാണ് സംഭവം.

മൊബൈൽ ഫോൺ ക്യാമറ ഉപയോഗിച്ച് ചോദ്യപേപ്പർ സ്കാൻ ചെയ്ത്, ഗൂഗിൾ ജെമിനി വഴി ഉത്തരങ്ങൾ കണ്ടെത്താനായിരുന്നു പ്രതികളുടെ ശ്രമം. കാലിൽ ഘടിപ്പിച്ച പ്രത്യേക ഉപകരണവും ബ്ലൂടൂത്ത് ഹെഡ്സെറ്റും ഇതിനായി ഉപയോഗിച്ചു.

ALSO READ: നിതിൻ രാജിന്റെ മരണം: കേസെടുത്ത് ദേശീയ പട്ടികജാതി കമ്മീഷൻ; കളക്ടർക്കും എസ്പിക്കും നോട്ടീസ്, 15 ദിവസത്തിനകം റിപ്പോർട്ട് നൽകണം

പരീക്ഷാഹാളിലെ അനീഷിന്റെ പെരുമാറ്റത്തിൽ സംശയം തോന്നിയ ഇൻവിജിലേറ്റർ വിവരം പിഎസ്‌സി അധികൃതരെ അറിയിച്ചു. തുടർന്ന് പിഎസ്‌സി വിജിലൻസും ഫോർട്ട് പൊലിസും എത്തി പരിശോധന നടത്തി. പരിശോധനയിൽ മൊബൈൽ ഫോണും ഇലക്ട്രോണിക് ഉപകരണങ്ങളും കണ്ടെത്തി. അനീഷിനെ സഹായിച്ചിരുന്ന അരുണിനെയും പൊലിസ് പരീക്ഷാ കേന്ദ്രത്തിന് സമീപത്തുനിന്ന് പിടികൂടി.