മുംബൈ: ഐപിഎൽ 2026-ൽ തോൽവികളിൽ തളർന്ന മുംബൈ ഇന്ത്യൻസിനെ വിടാതെ വിവാദങ്ങൾ. ക്യാപ്റ്റൻ ഹാർദിക് പാണ്ഡ്യ ഫ്രാഞ്ചൈസിയുടെ ഔദ്യോഗിക ഇൻസ്റ്റാഗ്രാം പേജ് അൺഫോളോ ചെയ്തെന്ന വാർത്തകളാണ് ഇപ്പോൾ ക്രിക്കറ്റ് ലോകത്ത് ചർച്ചയാകുന്നത്. ആർസിബിക്കെതിരായ നിർണ്ണായക മത്സരത്തിൽ അവസാന പന്തിൽ തോറ്റ് മുംബൈ പ്ലേ ഓഫ് കാണാതെ പുറത്തായതിന് പിന്നാലെയാണ് ക്യാപ്റ്റന്റെ ഭാഗത്ത് നിന്ന് ഇത്തരമൊരു നീക്കമുണ്ടായതെന്ന് റിപ്പോർട്ടുകൾ സൂചിപ്പിക്കുന്നു.

ഇൻസ്റ്റാഗ്രാം 'ഡ്രാമ'യും അർദ്ധരാത്രിയിലെ പരിശീലനവും

കഴിഞ്ഞ മൂന്ന് മത്സരങ്ങളിൽ പരിക്കിന്റെ പേരിൽ ഹാർദിക് കളിച്ചിരുന്നില്ല. താരം പുറംവേദന മൂലം വിശ്രമത്തിലാണെന്നാണ് മാനേജ്‌മെന്റ് വിശദീകരിച്ചത്. എന്നാൽ, ഇതിനിടെ പുലർച്ചെ 1:30-ന് ഹാർദിക് നെറ്റ്‌സിൽ ഒറ്റയ്ക്ക് പരിശീലനം നടത്തുന്ന വീഡിയോ പങ്കിട്ടത് ആരാധകർക്കിടയിൽ സംശയത്തിന് ഇടയാക്കി. ടീം മാനേജ്‌മെന്റുമായി ഹാർദിക് അത്ര നല്ല ബന്ധത്തിലല്ല എന്ന സൂചനയാണ് ഇത് നൽകുന്നത്. മുംബൈയെ അൺഫോളോ ചെയ്ത ശേഷം താരം വീണ്ടും ഫോളോ ചെയ്തതായും പറയപ്പെടുന്നുണ്ടെങ്കിലും ഇതിന്റെ സ്ക്രീൻഷോട്ടുകളോ വ്യക്തമായ തെളിവുകളോ പുറത്തുവന്നിട്ടില്ല.

'ഇത് അനാദരവ്': മൈക്കൽ വോൺ

ഹാർദിക്കിന്റെ ഈ പ്രവർത്തിക്കെതിരെ മുൻ ഇംഗ്ലണ്ട് നായകൻമാരായ മൈക്കൽ വോണും അലസ്റ്റർ കുക്കും കടുത്ത ഭാഷയിലാണ് പ്രതികരിച്ചത്. 'സ്റ്റിക് ടു ക്രിക്കറ്റ്' എന്ന പോഡ്‌കാസ്റ്റിൽ സംസാരിക്കവെ, ഹാർദിക്കിന്റെ നീക്കം ഫ്രാഞ്ചൈസിയോടുള്ള തികഞ്ഞ അനാദരവാണെന്ന് വോൺ വിശേഷിപ്പിച്ചു.

"കഴിവുള്ള ഒരു കൂട്ടം താരങ്ങൾ ഉണ്ടായിട്ടും ഒരു ടീം നടത്തുന്ന ഏറ്റവും മോശം പ്രകടനമാണിത്. രോഹിത് ശർമ്മ, സൂര്യകുമാർ യാദവ്, ജസ്പ്രീത് ബുംറ തുടങ്ങിയ ലോകോത്തര താരങ്ങൾ ഉണ്ടായിട്ടും മുംബൈ തകർന്നടിഞ്ഞു. ഗുജറാത്തിൽ പോയി കിരീടം നേടിയ ഹാർദിക്കിനെ മുംബൈ വലിയ പ്രതീക്ഷയോടെയാണ് തിരിച്ചെത്തിച്ചത്, എന്നാൽ ഇപ്പോൾ എല്ലാം കൈവിട്ടുപോയിരിക്കുന്നു," വോൺ തുറന്നടിച്ചു.

തകർച്ചയുടെ റെക്കോർഡുമായി മുംബൈ

ലഖ്‌നൗ സൂപ്പർ ജയന്റ്‌സിന് പിന്നാലെ ഈ സീസണിൽ പ്ലേ ഓഫ് കാണാതെ പുറത്താകുന്ന രണ്ടാമത്തെ ടീമായി മുംബൈ മാറി. കഴിഞ്ഞ ആറ് വർഷത്തിനിടെ ഇത് നാലാം തവണയാണ് മുംബൈ ആദ്യ നാലിൽ എത്താതെ പോകുന്നത്. നിലവിൽ പോയിന്റ് പട്ടികയിൽ ഒമ്പതാം സ്ഥാനത്തുള്ള മുംബൈ, ബാക്കിയുള്ള മത്സരങ്ങളും തോറ്റാൽ വീണ്ടും 'വുഡൻ സ്പൂൺ' (അവസാന സ്ഥാനം) ജേതാക്കളാകേണ്ടി വരും.

ക്യാപ്റ്റനും മാനേജ്‌മെന്റും തമ്മിലുള്ള ഈ അസ്വാരസ്യങ്ങൾ വരും സീസണുകളിൽ മുംബൈ ഇന്ത്യൻസിന്റെ ഭാവി തന്നെ ചോദ്യം ചെയ്യുന്നതാണ്. ഹാർദിക് അടുത്ത സീസണിൽ ടീമിൽ തുടരുമോ എന്ന കാര്യത്തിലും ഇപ്പോൾ അനിശ്ചിതത്വം നിലനിൽക്കുന്നു.