ഫുജൈറ: യുഎഇ നിവാസികൾ ഏറെ ആകാംഷയോടെ കാത്തിരുന്ന ഇത്തിഹാദ് റെയിൽ പാസഞ്ചർ ട്രെയിനിന്റെ യാത്രാനുഭവം പങ്കുവെച്ച് മാധ്യമപ്രവർത്തകർ. ചൊവ്വാഴ്ച നടന്ന പ്രത്യേക വാർത്താസമ്മേളനത്തിന്റെ ഭാഗമായി ഫുജൈറ സ്റ്റേഷനിൽ നിന്ന് ഹജർ പർവതനിരകളിലൂടെ നടത്തിയ പരീക്ഷണ യാത്രയുടെ തത്സമയ വിവരങ്ങളാണ് ഇപ്പോൾ പുറത്തുവന്നിരിക്കുന്നത്. യുഎഇയുടെ പ്രകൃതിഭംഗി ആസ്വദിച്ചുകൊണ്ട് അതിവേഗത്തിൽ സഞ്ചരിക്കാവുന്ന ഈ ട്രെയിൻ യാത്ര രാജ്യത്തെ പൊതുഗതാഗത രംഗത്ത് പുതിയൊരു ചരിത്രമാകും.

നെറ്റ്‌വർക്കിലെ ആദ്യത്തെ പൂർത്തിയായ പാസഞ്ചർ സ്റ്റേഷനായ ഫുജൈറയിൽ നിന്നാണ് ട്രെയിൻ യാത്ര ആരംഭിക്കുന്നത്. യാത്രക്കാർക്കായി 'കംഫർട്ട്', 'പ്രീമിയം' എന്നിങ്ങനെ രണ്ട് അത്യാധുനിക ക്ലാസുകളാണ് ട്രെയിനിൽ ഒരുക്കിയിരിക്കുന്നത്. ദുബൈ മെട്രോയ്ക്ക് സമാനമായി ട്രെയിൻ പുറപ്പെടുന്നതിന് മുൻപ് വാതിലുകൾ അടയുമെന്ന അറിയിപ്പുകൾ അറബിയിലും ഇംഗ്ലീഷിലും യാത്രക്കാർക്ക് ലഭിക്കും. സ്ലൈഡിംഗ് ഡോറുകൾ വഴി വേർതിരിച്ച കമ്പാർട്ടുമെന്റുകളിൽ വലിയ ലഗേജുകൾ സൂക്ഷിക്കാനുള്ള പ്രത്യേക സൗകര്യവും ഒരുക്കിയിട്ടുണ്ട്.

യാത്രക്കാർക്ക് മികച്ച യാത്രാസുഖം ഉറപ്പാക്കുന്നതിനായി ഇരിപ്പിടങ്ങൾ വളരെ ശാസ്ത്രീയമായാണ് രൂപകൽപ്പന ചെയ്തിരിക്കുന്നത്. ഇരുണ്ട ചാരനിറത്തിലുള്ള കംഫർട്ട് സീറ്റുകൾക്ക് പുറമെ, മൊബൈലുകളും മറ്റ് ഇലക്ട്രോണിക് ഉപകരണങ്ങളും ചാർജ് ചെയ്യാനുള്ള പോർട്ടുകളും ഓരോ സീറ്റിനൊപ്പവുമുണ്ട്. ജാക്കറ്റുകളും ബാഗുകളും തൂക്കിയിടാൻ സാധിക്കുന്ന കൊളുത്തുകളും ഇതിലുണ്ട്. നാല് സീറ്റുകൾ വീതമുള്ള ക്ലസ്റ്ററുകളായും അവയ്ക്ക് നടുവിൽ ട്രേ ടേബിളുകളുമായാണ് ഭൂരിഭാഗം സീറ്റുകളും ക്രമീകരിച്ചിരിക്കുന്നത്.

അതേസമയം, പ്രീമിയം വിഭാഗത്തിൽ കൂടുതൽ വീതിയേറിയതും പിന്നിലേക്ക് ചാരിയിരിക്കാവുന്നതുമായ ആഡംബര സീറ്റുകളാണ് യാത്രക്കാരെ കാത്തിരിക്കുന്നത്. ഇതിന് പുറമെ ഗർഭിണികൾക്കും മുതിർന്ന പൗരന്മാർക്കുമായി പ്രത്യേകമായി സംവരണം ചെയ്ത ഇരിപ്പിടങ്ങളും ട്രെയിനിൽ സജ്ജീകരിച്ചിട്ടുണ്ട്. ഹജർ പർവതനിരകളുടെ തൊട്ടടുത്തുകൂടിയുള്ള ഈ ട്രെയിൻ യാത്ര യുഎഇയിലെ ഏറ്റവും മനോഹരമായ യാത്രാനുഭവങ്ങളിൽ ഒന്നായിരിക്കുമെന്നാണ് ആദ്യ യാത്രയിൽ പങ്കെടുത്തവർ സാക്ഷ്യപ്പെടുത്തുന്നത്.

ALSO READ: 127 രാജ്യങ്ങളിലേക്ക് വിസയില്ലാതെ യാത്ര ചെയ്യാം; ലോകത്തെ ഏറ്റവും ശക്തമായ പാസ്‌പോര്‍ട്ട് ഇക്കുറിയും യു.എ.ഇയുടേത് തന്നെ; ഇന്ത്യയുടെ സ്ഥാനം 67

Media outlets share stunning travel experiences aboard the Etihad Rail passenger train as it passes through the scenic Hajar Mountains. The journey highlights UAE’s upcoming rail network, modern transport system, and breathtaking landscapes.