കാക്കനാട് : തൃക്കാക്കര ചിറ്റേത്തുകരയില്‍ വഴിയാത്രക്കാരായ യുവാവിനും, യുവതിക്കും നേരെ ആക്രമണം. കാക്കനാട് സ്വകാര്യ ഐ.ടി കമ്പനി ജീവനക്കാരനായ ശംഭുവിനും, സുഹൃത്തും പി.എച്ച്.ടി വിദ്യാര്‍ഥിനിയുമായ അശ്വനിക്കും നേരെയാണ് ആക്രമണം ഉണ്ടായത്. കാര്‍ യാത്രക്കാരായ രണ്ടു പേരില്‍ നിന്നാണ് ആക്രമണമുണ്ടായത്.
ഇരുവരും തിരുവനന്തപുരം സ്വദേശികളാണ്. വ്യാഴായ്ച്ച വൈകിട്ട് 4.30ന് ചിറ്റേത്തുകര സ്വകാര്യ വസ്ത്ര ശാലയിലേക്ക് നടന്നു പോകുന്നതിനിടെ റോഡ് മുറിച്ചു കടക്കുമ്പോള്‍ അശ്രദ്ധയോടെ വന്ന വാഹനത്തിലുള്ളവരുമായി ചെറിയ വാക്കു തര്‍ക്കമുണ്ടാകുകയും ചെയ്തു. തുടര്‍ന്നു വസ്ത്ര ശാലയിലെത്തിയ ഇവരുടെ പിന്നാലെ വാഹനത്തിലുള്ളവര്‍ എത്തുകയും അസഭ്യം പറഞ്ഞുകൊണ്ട് യുവതിയുടെ കൈപിടിച്ച് തിരിക്കുകയും തുടര്‍ന്നുണ്ടായ സംഘര്‍ഷത്തില്‍ യുവാവിന്റെ വലതു കൈയ്യില്‍ മൂര്‍ച്ചയുള്ള ആയുധം കൊണ്ട് ആക്രമണകാരികളില്‍ നിന്നു പരുക്കേല്‍ക്കുകയും ചെയ്തു. പരുക്കേറ്റ ഇവരെ കാക്കനാട് സ്വകാര്യ ആശുപത്രിയില്‍ പ്രവേശിപ്പിച്ചു.