പത്തനംതിട്ട: ആറന്മുള ഉത്രട്ടാതി വള്ളംകളി ഇന്ന്. കിഴക്ക് ഇടക്കുളം മുതല്‍ പടിഞ്ഞാറ് ചെന്നിത്തല വരെയുള്ള 50 പള്ളിയോടങ്ങള്‍ വള്ളംകളിയില്‍ പങ്കെടുക്കും. ഉച്ചയ്ക്ക് 1.30ന് ജല ഘോഷയാത്രയോടെയാണ് ജലമേള ആരംഭിക്കുക.
സത്രക്കടവില്‍ നിന്നും കിഴക്കോട്ടാണ് ഘോഷയാത്ര. പാരമ്പര്യ തനിമ വിളിച്ചോതുന്ന തരത്തിലാണ് ജലഘോഷയാത്ര നടക്കുക. മൂന്നോടെ മത്സരം ആരംഭിക്കും. എ ബാച്ചിലെ 33 പള്ളിയോടങ്ങളും ബി ബാച്ചിലെ 17 പള്ളിയോടങ്ങളും മത്സരത്തില്‍ പങ്കെടുക്കും. ഏറ്റവും കുറഞ്ഞ സമയം കൊണ്ട് ഒരേ താളത്തില്‍ തുഴഞ്ഞെത്തുന്ന ബാച്ചിലെ പള്ളിയോടങ്ങള്‍ ഫൈനലില്‍ മത്സരിക്കും.
കേന്ദ്ര പാര്‍ലമെന്ററികാര്യ മന്ത്രി എച്ച്.എന്‍ അനന്തകുമാര്‍ ഉദ്ഘാടനം ചെയ്യും. മത്സരത്തിന്റെ ഉദ്ഘാടനം ജലവിഭവ മന്ത്രി മാത്യു ടി. തോമസ് നിര്‍വഹിക്കും. ജലമേളയ്ക്കുള്ള ഒരുക്കങ്ങള്‍ പൂര്‍ത്തിയായതായി പള്ളിയോട സേവാസംഘം ഭാരവാഹികള്‍ അറിയിച്ചു.