കാസര്‍കോട്: കാര്‍ തടഞ്ഞു നിര്‍ത്തി സ്വര്‍ണ വ്യാപാരിയുടെ പണം കൊള്ള നടത്തിയ സംഭവത്തില്‍ സംഘത്തിലെ രണ്ടു പേര്‍ കൂടി പൊലിസ് പിടിയിലായി. കഴിഞ്ഞ മാസം ചെര്‍ക്കള ബേവിഞ്ച വളവില്‍ വച്ച് സ്വര്‍ണ വ്യാപാരിയുടെ കാര്‍ തടഞ്ഞു നിര്‍ത്തി കോടികള്‍ തട്ടിയെടുത്ത കേസില്‍ കണ്ണൂര്‍ കൂത്തുപറമ്പ് സ്വദേശികളായ സായൂജ്, റംഷാദ് എന്നിവരാണ് പിടിയിലായത്.
60 ലക്ഷം രൂപയാണ് ഇപ്പോള്‍ പിടിയിലായവര്‍ക്ക് കൊള്ളക്ക് പ്രതിഫലമായി സംഘം വാഗ്ദാനം നല്‍കിയതെന്നാണ് സൂചന. 20 ലക്ഷം രൂപ കര്‍ണാടകയിലെ ഒരു പണമിടപാട് സ്ഥാപനത്തില്‍ ഇവര്‍ നിക്ഷേപിച്ചതായി പൊലിസിന് സൂചന ലഭിച്ചതിനെ തുടര്‍ന്ന് അന്വേഷണ സംഘം കര്‍ണാടകയിലേക്ക് പോയിട്ടുണ്ട്.
കേസില്‍ പത്തു പ്രതികളാണ് ഉള്ളത്. സംഭവത്തില്‍ കൂത്തുപറമ്പ് സ്വദേശി മൃദുലിനെ നേരത്തെ പൊലിസ് അറസ്റ്റു ചെയ്തിരുന്നു. ഇയാളെ കോടതിയില്‍ നിന്നും കസ്റ്റഡിയില്‍ വാങ്ങി കൂടുതല്‍ ചോദ്യം ചെയ്തതിനെ തുടര്‍ന്നാണ് കൊള്ളയില്‍ നേരിട്ട് പങ്കെടുത്തവരെന്നു പൊലിസ് കണ്ടെത്തിയ അഞ്ചുപേരില്‍ രണ്ടു പേര്‍ കൂടി വലയിലായത്. കേസില്‍ ഇനിയും ഏഴുപേരെ കൂടി അന്വേഷണ സംഘത്തിന് കണ്ടെത്തേണ്ടതുണ്ട്.
കഴിഞ്ഞ മാസം ഏഴിനാണ് തലശ്ശേരി തിരുവങ്ങാട്ടെ സ്വര്‍ണവ്യാപാരിയുടെ പണം കൊള്ളയടിച്ചത്. സ്വര്‍ണ വ്യാപാരിയുടെ സഹായി ഗണേശനും ഡ്രൈവറും മാത്രമാണ് സംഭവ സമയത്ത് കാറില്‍ ഉണ്ടായിരുന്നത്. മഹാരാഷ്ട്രയില്‍ നിന്നും കൊണ്ടുവരികയായിരുന്നു പണം.
ഈ വിവരം മുന്‍കൂട്ടി അറിഞ്ഞ കൊള്ളസംഘം ജില്ലാ അതിര്‍ത്തിയായ തലപ്പാടി മുതല്‍ മറ്റൊരു വാഹനത്തില്‍ പിന്തുടരുകയും ബേവിഞ്ച വളവിലെത്തിയപ്പോള്‍ വ്യാപാരിയുടെ കാറില്‍ തങ്ങളുടെ കാര്‍ ഇടിപ്പിച്ച് തടഞ്ഞു നിര്‍ത്തുകയും തുടര്‍ന്ന് തോക്കു ചൂണ്ടി ഭീഷണിപ്പെടുത്തി കാറിലെ രഹസ്യ അറയില്‍ സൂക്ഷിച്ചിരുന്ന പണം കൊള്ളയടിച്ചെന്നുമാണ് കേസ്.