ന്യൂഡല്‍ഹി: ഡി.കെ ശിവകുമാര്‍ കര്‍ണാടക മുഖ്യമന്ത്രിയാകും. ഇതു സംബന്ധിച്ച ഹൈക്കമാന്‍ഡ് തീരുമാനം അടുത്ത ദിവസങ്ങളിലുണ്ടാകുമെന്നാണ് വിവരം. അടുത്ത ആഴ്ച്ചയാവും ശിവകുമാറിന്റെ സത്യപ്രതിജ്ഞ. ഈ ആഴ്ച്ച തന്നെ സിദ്ധരാമയ്യ രാജി നല്‍കും.

നേരത്തെ കോൺഗ്രസ് അധ്യക്ഷൻ മല്ലികാർജ്ജുൻ ഖർഗെയോ അല്ലെങ്കിൽ മറ്റൊരു പ്രമുഖ ദളിത് നേതാവോ ഈ പദവിയിലേക്ക് എത്തിയേക്കുമെന്ന് റിപ്പോർട്ടുകളുണ്ടായിരുന്നെങ്കിലും എ.ഐ.സി.സി (AICC) വൃത്തങ്ങൾ ഇത് തൽക്കാലം സ്ഥിരീകരിക്കുന്നില്ല. മുഖ്യമന്ത്രി സ്ഥാനം ഒഴിയുന്ന സിദ്ധരാമയ്യയെ രാജ്യസഭയിലേക്ക് അയക്കാനാണ് നിലവിൽ കോൺഗ്രസ് നേതൃത്വത്തിന്റെ ആലോചന.

കോൺഗ്രസ് അധ്യക്ഷൻ മല്ലികാർജ്ജുൻ ഖർഗെ, രാഹുൽ ഗാന്ധി, എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ എന്നിവരുടെ നേതൃത്വത്തിലാണ് സിദ്ധരാമയ്യയുമായും ഡി.കെ ശിവകുമാറുമായും ഡൽഹിയിൽ വെച്ച് പ്രത്യേകം ചർച്ചകൾ നടത്തിയത്. ലോക്സഭാ തെരഞ്ഞെടുപ്പിന് പിന്നാലെ സംസ്ഥാന ഭരണത്തിൽ മാറ്റം വേണമെന്ന ആവശ്യം പാർട്ടിയിൽ ശക്തമായിരുന്നു.