മനാമ:ഒഡിഷയില്‍ ആശുപത്രി അധികൃതര്‍ ആംബുലന്‍സ് നിഷേധിച്ചതിനെ തുടര്‍ന്ന് ഭാര്യയുടെ മൃതദേഹം ചുമന്ന ദനാ മാഞ്ചിക്ക് ബഹ്‌റൈന്‍ പ്രധാനമന്ത്രി പ്രഖ്യാപിച്ച 8.9 ലക്ഷം രൂപയുടെ (5000 ദിനാര്‍) കൈമാറി.
ഡല്‍ഹിയിലെ ബഹ്‌റൈന്‍ എംബസിയിലെത്തിയാണ് മാഞ്ചി സഹായം സ്വീകരിച്ചത്. ഡല്‍ഹിയിലേക്കുള്ള വിമാനടിക്കറ്റും ബഹ്‌റൈന്‍ നല്‍കിയിരുന്നു.
ബി.ബി.കെ (ബാങ്ക് ഓഫ് ബഹ്‌റൈന്‍ ആന്റ് കുവൈത്ത്) ബാങ്കിന്റെ ചെക്കാണ് നല്‍കിയത്.'വളരെയധികം സന്തോഷമുണ്ട്. എന്റെ മൂന്നു മക്കളുടെയും പഠനത്തിന് ഉപയോഗിക്കാന്‍ ഈ പണം ഞാന്‍ ബാങ്കില്‍ നിക്ഷേപിക്കുമെന്ന് മാഞ്ചി പറഞ്ഞു. ഭാര്യ മരിച്ചപ്പോള്‍ ഞാനും മകള്‍ ചാന്ദിനിയും സഹായത്തിനു വേണ്ടി നിലവിളിച്ചു.
ആരും സഹായിക്കാന്‍ ഉണ്ടായില്ല. ഭാര്യയുടെ മൃതദേഹവും കൊണ്ടു ഉടന്‍ അവിടെ നിന്ന് പോകാന്‍ ആരോ ആജ്ഞാപിച്ചു.
അതുകൊണ്ടാണ് ഒരു ലുങ്കിയില്‍ മൃതദേഹം പൊതിഞ്ഞ് എടുത്തു നടന്നതെന്നും മാഞ്ചി പറഞ്ഞു.
കഴിഞ്ഞ മാസം 24ന് ഒഡിഷയിലെ പിന്നാക്ക ജില്ലയായ കലാഹന്തിയിലായിരുന്നു മനസാക്ഷിയെ ഞെട്ടിച്ച സംഭവം. ക്ഷയരോഗിയായ ഭാര്യ ആശുപത്രിയില്‍ മരണമടഞ്ഞതിനെ തുടര്‍ന്ന് മൃതദേഹം വാഹനത്തില്‍ കൊണ്ടുപേകാന്‍ പണമില്ലാതെ ഇദ്ദേഹം 60 കിലോമീറ്റര്‍ അകലെയുള്ള ഗ്രാമത്തിലേക്ക് മകള്‍ക്കൊപ്പം നടക്കുകയായിരുന്നു.മൃതദേഹം തോളിലേറ്റി പത്തു കിലോ മീറ്ററോളം നടന്നപ്പോഴാണ് സംഭവം ഒരു പ്രാദേശിക ചാനലിന്റെ ശ്രദ്ധയില്‍ പെട്ടത്.