ലിസ്ബൺ: അമേരിക്കയിലും മെക്‌സിക്കോയിലുമായി ജൂൺ 11-ന് ചരിത്രത്തിലെ ഏറ്റവും വലിയ ഫിഫ ലോകകപ്പിന് തിരിതെളിയുമ്പോൾ, ഫുട്ബോൾ ലോകം ഉറ്റുനോക്കുന്നത് പോർച്ചുഗൽ ഇതിഹാസം ക്രിസ്റ്റ്യാനോ റൊണാൾഡോയിലേക്കാണ്. തന്റെ 41-ാം വയസ്സിൽ ആറാം ലോകകപ്പിനായി സിആർ7 ബൂട്ട് കെട്ടുമ്പോൾ, നായകന് വേണ്ടി കനകക്കിരീടം നേടുക എന്ന ഒരൊറ്റ ലക്ഷ്യം മാത്രമാണ് പോർച്ചുഗൽ ടീമിനുള്ളതെന്ന് വ്യക്തമാക്കിയിരിക്കുകയാണ് സഹതാരങ്ങളായ റൂബൻ ഡയസും വിറ്റിൻഹയും.

രണ്ട് പതിറ്റാണ്ടിലേറെയായി പോർച്ചുഗൽ ദേശീയ ടീമിന്റെ നെടുംതൂണായ റൊണാൾഡോയുടെ കരിയറിലെ അവസാന ലോകകപ്പാകും ഇത്. ഈ വേനൽക്കാലത്ത് തന്റെ കരിയറിലെ ഏക അപൂർണ്ണതയായ ലോകകപ്പ് കിരീടം റൊണാൾഡോയ്ക്ക് നേടിക്കൊടുക്കുക എന്നത് ടീമിന് വലിയൊരു പ്രചോദനമാണെന്ന് മാഞ്ചസ്റ്റർ സിറ്റി പ്രതിരോധ താരം റൂബൻ ഡയസ് വ്യക്തമാക്കി.

"ഇത് അധിക സമ്മർദ്ദമല്ല, വലിയൊരു ആഗ്രഹമാണ്" - റൂബൻ ഡയസ്

പ്രമുഖ കായിക മാധ്യമമായ 'എ ബോല'യോട് സംസാരിക്കവെയാണ് റൂബൻ ഡയസ് ടീമിന്റെ മനസ്സ് തുറന്നത്.

"റൊണാൾഡോയ്ക്കായി ലോകകപ്പ് നേടുക എന്നത് ഞങ്ങൾക്ക് പ്രചോദനത്തിന്റെ അധിക ഘടകമാണ്. അദ്ദേഹത്തിന് വേണ്ടിയും, ഞങ്ങൾക്ക് വേണ്ടിയും, ഒപ്പം മുഴുവൻ പോർച്ചുഗൽ ജനതയ്ക്കും ഞങ്ങളുടെ കുടുംബങ്ങൾക്കും വേണ്ടി ആ ചരിത്ര നിമിഷം സമ്മാനിക്കാൻ കഴിയുന്നത് വലിയൊരു ഭാഗ്യമായിരിക്കും. ഇത് ഞങ്ങൾക്ക് മേൽ അധിക സമ്മർദ്ദമുണ്ടാക്കുന്നില്ല. മറിച്ച്, അവിടെ വിജയിക്കണമെന്ന പ്രത്യേകമായ വലിയൊരു ആഗ്രഹമാണ് നൽകുന്നത്" എന്ന് റൂബൻ ഡയസ് പറഞ്ഞു.

"അദ്ദേഹത്തോടൊപ്പം കളിക്കുന്നത് അഭിമാനം" - വിറ്റിൻഹ

ലോകകപ്പിന് മുന്നോടിയായി ഫിഫയ്ക്ക് നൽകിയ അഭിമുഖത്തിൽ പാരീസ് സെന്റ് ജെർമെയ്ൻ (PSG) മിഡ്‌ഫീൽഡർ വിറ്റിൻഹയും റൊണാൾഡോയെ പ്രശംസകൾ കൊണ്ട് മൂടി.

"ചരിത്രത്തിലെ ഏറ്റവും മികച്ച കളിക്കാരിൽ ഒരാളായ റൊണാൾഡോയ്‌ക്കൊപ്പം ഡ്രസ്സിംഗ് റൂം പങ്കിടാൻ കഴിയുന്നത് തന്നെ വലിയ അഭിമാനമാണ്. എല്ലാ ദിവസവും അദ്ദേഹത്തിന്റെ കഠിനാധ്വാനവും പ്രൊഫഷണലിസവും കൺമുന്നിൽ കാണാൻ കഴിയുന്നു. അദ്ദേഹത്തിൽ നിന്ന് ഒരുപാട് കാര്യങ്ങൾ പഠിക്കാനുണ്ട്. യാദൃശ്ചികമായി ഒന്നും സംഭവിക്കാൻ അദ്ദേഹം വിട്ടുകൊടുക്കില്ല, 100 ശതമാനം സജ്ജമായാണ് അദ്ദേഹം എപ്പോഴും മൈതാനത്തേക്ക് ഇറങ്ങുന്നത്. റൊണാൾഡോയ്ക്കൊപ്പം അദ്ദേഹത്തിന് വേണ്ടി ഇത്തവണ ലോകകപ്പ് നേടാനാകുമെന്ന് തന്നെയാണ് പ്രതീക്ഷ എന്ന് വിറ്റിൻഹ പറഞ്ഞു.

പോർച്ചുഗലിന്റെ ഗ്രൂപ്പ് മത്സരങ്ങൾ

ഇത്തവണത്തെ ലോകകപ്പിൽ ശക്തരായ പോർച്ചുഗൽ ഗ്രൂപ്പ് കെ-യിലാണ് (Group K) മത്സരിക്കുന്നത്. ജൂൺ 17-നാണ് പോർച്ചുഗലിന്റെ ആദ്യ മത്സരം.

• ജൂൺ 17: പോർച്ചുഗൽ Vs ഡിആർ കോംഗോ
• ജൂൺ 23: പോർച്ചുഗൽ Vs ഉസ്ബെക്കിസ്ഥാൻ
• ജൂൺ 28: പോർച്ചുഗൽ Vs കൊളംബിയ

തങ്ങളുടെ പ്രിയപ്പെട്ട ക്യാപ്റ്റന്റെ കയ്യിലേക്ക് കനകക്കിരീടം വെച്ചുകൊടുത്ത് ഒരു ഇതിഹാസ യാത്രയയപ്പ് നൽകാൻ പോർച്ചുഗൽ ടീം ഒന്നടങ്കം ഉറച്ചുറച്ചുകഴിഞ്ഞു എന്നതിന്റെ തെളിവാണ് താരങ്ങളുടെ ഈ വാക്കുകൾ.