ദുബൈ: അപൂർവ രോഗം ബാധിച്ച് തളർന്നുപോയ പത്തു വയസ്സുകാരൻ യൂസഫ് ഹൈദറിന്റെ ജീവൻ രക്ഷിക്കാൻ ലോകത്തിലെ ഏറ്റവും ചെലവേറിയ ചികിത്സാ കുത്തിവെയ്പ്പ് ഒരുക്കി യുഎഇ. മനുഷ്യത്വത്തിന്റെ ഉദാത്തമായ മാതൃക ലോകത്തിന് മുന്നിൽ കാണിച്ച്, ഒരൊറ്റ കാമ്പയിനിലൂടെ 10.6 ദശലക്ഷം ദിർഹമാണ് (ഏകദേശം 24 കോടിയിലധികം ഇന്ത്യൻ രൂപ) കുട്ടിയുടെ ചികിത്സയ്ക്കായി യുഎഇ സമാഹരിച്ചത്.

ഹൃദയത്തെയും പേശികളെയും ക്രമേണ തളർത്തുന്ന ‘ഡുച്ചെൻ മസ്കുലർ ഡിസ്ട്രോഫി’ എന്ന കഠിനമായ ജനിതക രോഗത്തോടായിരുന്നു ഈ ഇറാഖി കുരുന്ന് പോരാടിയിരുന്നത്.

സമയത്തിനെതിരായ ആ ഓട്ടം ജയിച്ചപ്പോൾ

യൂസഫിന് നാല് വയസ്സുള്ളപ്പോഴാണ് ശരീരം തളരുന്ന ഈ രോഗം തിരിച്ചറിയുന്നത്. പ്രായം കൂടുംതോറും മകന്റെ അവസ്ഥ വഷളാകുന്നത് കണ്ട് വർഷങ്ങളായി ഭയത്തോടെ ജീവിച്ച കുടുംബത്തിന് യുഎഇയുടെ കാരുണ്യം പുതുജീവൻ നൽകുകയായിരുന്നു.

"യൂസഫിനെ രക്ഷിക്കൂ... പേശികളും ഹൃദയവും പരാജയപ്പെടുന്നതിന് മുമ്പ് സമയത്തിനെതിരായ ഒരു ഓട്ടം" എന്ന പേരിൽ കഴിഞ്ഞ മാർച്ചിൽ അൽ ഖലീജ് പത്രമാണ് ഈ അഭ്യർത്ഥന ജനങ്ങളിലേക്ക് എത്തിച്ചത്.  പ്രമുഖ ജീവകാരുണ്യ സംഘടനയായ 'ദാർ അൽ ബെർ സൊസൈറ്റി'യുമായി സഹകരിച്ച് നടത്തിയ വൻ കാമ്പയിനിലൂടെ യുഎഇയിലെ പ്രവാസികളും സ്വദേശികളും ചേർന്ന് ദിവസങ്ങൾക്കുള്ളിൽ കോടികളുടെ ചികിത്സാ തുക ഒഴുക്കുകയായിരുന്നു.

വിപുലമായ വൈദ്യപരിശോധനകൾക്കും ലബോറട്ടറി ടെസ്റ്റുകൾക്കും ശേഷം യൂസഫിന് വിജയകരമായി ഈ വിലകൂടിയ കുത്തിവെയ്പ്പ് നൽകിയെന്ന് പിതാവ് ഹൈദർ അൽ വാലി സ്ഥിരീകരിച്ചു.

"യുഎഇ എന്റെ കുട്ടിയുടെ ജീവൻ രക്ഷിക്കുക മാത്രമല്ല ചെയ്തത്, ദുർബലമായ പ്രതീക്ഷകൾക്കും നിരന്തരമായ ഭയത്തിനും ഇടയിൽ വർഷങ്ങളായി ശ്വാസം മുട്ടി ജീവിച്ചിരുന്ന ഒരു കുടുംബത്തെ മുഴുവനുമാണ് രക്ഷിച്ചത്." വികാരഭരിതയായ യൂസഫിന്റെ മാതാവ് പറഞ്ഞു.

ലോകത്തിലെ ഏറ്റവും ദയാലുവായ രാജ്യമെന്ന് യുഎഇ വീണ്ടും തെളിയിച്ച ഈ സംഭവം, സോഷ്യൽ മീഡിയയിൽ ലക്ഷക്കണക്കിന് ആളുകളുടെ കണ്ണുനിറയിക്കുകയും വലിയ കൈയടി നേടുകയും ചെയ്യുകയാണ്.

ALSO READ: അശ്രദ്ധമായ ഡ്രൈവിംഗും പെട്ടെന്നുള്ള ലെയ്ൻ മാറ്റവും അപകടങ്ങൾക്ക് കാരണമാകുന്നു; മുന്നറിയിപ്പുമായി അബുദബി പൊലിസ്

A humanitarian campaign in the UAE raised millions in support of an Iraqi child suffering from a rare disease, highlighting the country's strong culture of charity and compassion.