വാടാനപ്പള്ളി : വയോധികയായ അമ്മയെ ക്രൂരമായി ആക്രമിച്ച് ഇടത് കൈ തല്ലിയൊടിച്ച സംഭവത്തില്‍ മകന്‍ അറസ്റ്റില്‍. ചേറ്റുവ ഏങ്ങണ്ടിയൂര്‍ സ്വദേശിനി തുളസി (71)യെ ആക്രമിച്ച് പരുക്കേല്‍പ്പിച്ച സംഭവത്തില്‍ മകന്‍ മനോജിനെ (46) വാടാനപ്പള്ളി പൊലിസ് അറസ്റ്റ് ചെയ്തു.

ഈമാസം ആറിന് രാത്രി 10നായിരുന്നു സംഭവം. പ്രതിയുടെ കുടുംബത്തിലുണ്ടായ ദുരിതങ്ങള്‍ക്ക് കാരണം തന്റെ അമ്മ മന്ത്രവാദം ചെയ്തതാണെന്ന് ആരോപിച്ചായിരുന്നു ആക്രമണം. ചേറ്റുവയിലുള്ള തറവാട് വീട്ടില്‍ കസേരയില്‍ ഇരിക്കുകയായിരുന്ന തുളസിയെ പ്രതി ബലം പ്രയോഗിച്ച് താഴെയിടുകയും കൈകള്‍ കൊണ്ട് മര്‍ദിക്കുകയും കാലുകൊണ്ട് ചവിട്ടുകയും ചെയ്തു. കൂടാതെ ഇടത് കൈ പിടിച്ച് തിരിച്ച് ഒടിക്കുകയും അരയില്‍ കരുതിയിരുന്ന കത്തി ഉപയോഗിച്ച് കഴുത്തില്‍ കുത്തിക്കൊല്ലാന്‍ ശ്രമിക്കുകയും ചെയ്തു.

മനോജ് 2025 ല്‍ വീട്ടില്‍ വച്ച് ഭാര്യയെ കുത്തിക്കൊലപ്പെടുത്താന്‍ ശ്രമിച്ച കേസിലും 2024ല്‍ വാര്‍ഡ് മെംബറെ ആക്രമിച്ച് പരുക്കേല്‍പ്പിച്ച കേസിലും പ്രതിയാണ്. വാടാനപ്പള്ളി പൊലിസ് സ്റ്റേഷന്‍ എസ്.ഐ ലാല്‍സന്‍, എ.എസ്.ഐ കാജാ ഹുസൈന്‍, ഗ്രേഡ് സീനിയര്‍ സിവില്‍ പൊലിസ് ഓഫിസര്‍ മഹേഷ്, സിവില്‍ പൊലിസ് ഓഫിസര്‍ റിഷാദ് എന്നിവരാണ് പ്രതിയെ അറസ്റ്റ് ചെയ്തത്.

A 71-year-old woman was allegedly subjected to a brutal assault by her son, leaving her with a fractured hand. The elderly victim was admitted for medical treatment after the attack. Following a complaint, police arrested the accused and registered a case. Authorities are investigating the incident, which has drawn attention to the issue of violence against senior citizens within families.