കൊച്ചി: അന്തരിച്ച നടന്‍ സലീംകുമാറിന് വിട നല്‍കി നാട്. പറവൂര്‍ ചിറ്റേത്തുകരയിലെ വീട്ടുവളപ്പില്‍ സംസ്‌കാരച്ചടങ്ങുകള്‍ പൂര്‍ത്തിയായി. ഔദ്യോഗിക ബഹുമതികളോടെയായിരുന്നു സംസ്‌കാരചടങ്ങുകള്‍. അദ്ദേഹത്തിന്റെ ആഗ്രഹപ്രകാരം മതപരമായ ചടങ്ങുകള്‍ ഇല്ലാതെയണ് സംസ്‌കാരചടങ്ങുകള്‍ നടന്നത്. കോണ്‍ഗ്രസ് പതാക പുതപ്പിച്ച ശേഷം മൃതദേഹം ചിതയിലേക്കെടുക്കുകയായിരുന്നു. 

മക്കളായ ചന്തുവും ആരോമലും ചേര്‍ന്നാണ് ചിതയ്ക്ക് തീകൊളുത്തിയത്. മുഖ്യമന്ത്രി വി.ഡി സതീശന്‍ സംസ്‌കാരച്ചടങ്ങില്‍ പങ്കെടുത്തു. 

രാവിലെ എട്ടുമണിയോടെയാണ് മൃതദേഹം അമൃത ആശുപത്രിയില്‍ നിന്ന് ടൗണ്‍ഹാളില്‍ എത്തിച്ചത്.ഇവിടെ പൊതുദര്‍ശനത്തിന് ശേഷം രണ്ട് മണിയോടെ മൃതദേഹം വീട്ടുവളപ്പിലെത്തിച്ചു. അവസാന നിമിഷം വരെ പ്രിയനടനെ ഒരുനോക്കുകാണാനായി ഒട്ടേറെപ്പേരാണ് ഒഴുകിയെത്തിയത്. ന്യൂമോണിയ ബാധിച്ച് കൊച്ചിയിലെ സ്വകാര്യആശുപത്രിയില്‍ ചികിത്സയിലിരിക്കെ ഇന്നലെ രാത്രി 10.43നായിരുന്നു സലീം കുമാറിന്റെ അന്ത്യം. 56 വയസായിരുന്നു.

ശ്വാസതടസം നേരിട്ടതോടെയാണ് സലിം കുമാറിനെ അമൃത ആശുപത്രിയില്‍ പ്രവേശിപ്പിച്ചത്. ന്യൂമോണിയയും രക്തത്തിലെ അണുബാധയും അനുഭവപ്പെട്ടതോടെ വെന്റിലേറ്റര്‍, ആന്റിബയോട്ടിക്കുകള്‍, ഡയാലിസിസ് അടക്കമുള്ള ജീവന്‍ രക്ഷാമാര്‍ഗങ്ങള്‍ നല്‍കിയിരുന്നു. ഇതിനിടയില്‍ ഹൃദയാഘതമുണ്ടായതാണ് മരണകാരണം.

കഴിഞ്ഞ കുറച്ചു വര്‍ഷങ്ങളായി കരള്‍ സംബന്ധമായ അസുഖങ്ങളെത്തുടര്‍ന്ന് താരം ആരോഗ്യപരമായ വെല്ലുവിളികള്‍ നേരിട്ടിരുന്നു. ലിവര്‍ സിറോസിസ് ബാധിച്ചത് മദ്യപാനം കൊണ്ടല്ലെന്നും അത് പാരമ്പര്യമായി ലഭിച്ച അസുഖമാണെന്നും അദ്ദേഹം നേരത്തെ വെളിപ്പെടുത്തിയിരുന്നു