ന്യൂഡല്‍ഹി: നീറ്റ് പുനഃപരീക്ഷയുടെ ചോദ്യപേപ്പര്‍ രാജ്യമെമ്പാടുമുള്ള കേന്ദ്രങ്ങളില്‍ എത്തിക്കാന്‍ ഹെലികോപ്റ്ററുകള്‍.  വ്യോമസേനയുടെ M117 ഹെലികോപ്ടറുകളാണ് ഉപയോഗിക്കുക. പരീക്ഷാ നടത്തിപ്പില്‍ അതീവ സുരക്ഷ ഉറപ്പാക്കുന്നതിനും തടസ്സമില്ലാതെ പരീക്ഷ പൂര്‍ത്തിയാക്കുന്നതിനുമാണ് പ്രതിരോധ മന്ത്രാലയത്തിന്റെ നിര്‍ണായക നീക്കം. 

ജൂണ്‍ 21-നാണ് പരീക്ഷ നടക്കുന്നത്.  രാജ്യത്തിന്റെ വിവിധ ഭാഗങ്ങളിലുള്ള 18 കേന്ദ്രങ്ങളില്‍നിന്ന് വിമാനമാര്‍ഗ്ഗം പരീക്ഷാ ചോദ്യപേപ്പറുകള്‍ കൊണ്ടുപോകുന്നതിന് വ്യോമസേനയെ ചുമതലപ്പെടുത്തിയതായാണ് റിപ്പോര്‍ട്ട്. പരീക്ഷയുടെ വിജയകരമായ നടത്തിപ്പിനായി അധികൃതര്‍ ആവശ്യപ്പെടുന്ന ഏത് സഹായവും നല്‍കാന്‍ സായുധസേന സജ്ജമാണെന്ന് പ്രതിരോധ വൃത്തങ്ങള്‍ അറിയിച്ചു. നേരത്തെ ഉണ്ടായത് പോലുള്ള സുരക്ഷാ വീഴ്ചകള്‍ ഇല്ലാതിരിക്കാന്‍ സൈന്യത്തിന്റെ നേരിട്ടുള്ള സഹകരണം സഹായിക്കുമെന്നാണ് വിലയിരുത്തല്‍. 

ALSO READ: നീറ്റ് യുജി പുനഃപരീക്ഷ ചോദ്യപേപ്പര്‍ തയ്യാറാക്കുന്നവര്‍ പ്രത്യേക സുരക്ഷാ കേന്ദ്രത്തില്‍; ഫോണ്‍ ഉള്‍പെടെ സംവിധാനങ്ങള്‍ക്ക് വിലക്ക്, ലോക്ക്ഡൗണിന് സമാനമായ നിയന്ത്രണം  

നാഷണല്‍ ടെസ്റ്റിങ് ഏജന്‍സിയുടെ മേല്‍നോട്ടത്തില്‍ പരീക്ഷക്കായുള്ള ഒരുക്കങ്ങള്‍  അതിവേഗം പുരോഗമിക്കുകയാണ്. 
ചോദ്യപേപ്പര്‍ ചോര്‍ച്ചയുമായി ബന്ധപ്പെട്ട ആരോപണങ്ങളെത്തുടര്‍ന്ന് നേരത്തെ നടന്ന പരീക്ഷ റദ്ദാക്കിയിരുന്നു.  മെയില്‍ മൂന്നിന് നടന്ന ആദ്യ പരീക്ഷയില്‍ ക്രമക്കേടുകള്‍ കണ്ടെത്തിയതിനെത്തുടര്‍ന്ന് മെയ് 12-ന് നാഷണല്‍ ടെസ്റ്റിങ് ഏജന്‍സി പരീക്ഷ റദ്ദാക്കുകയായിരുന്നു. സംഭവത്തില്‍ നിലവില്‍ സി.ബി.ഐ അന്വേഷണം നടക്കുകയാണ്. 

ALSO READ: മൂല്യനിര്‍ണയത്തിലെ പാളിച്ച: കേന്ദ്രത്തിനും സി.ബി.എസ്.ഇക്കും നോട്ടിസയച്ച് ഡല്‍ഹി ഹൈക്കോടതി 

പരീക്ഷാകേന്ദ്രങ്ങളുടെ വിവരങ്ങള്‍ എന്‍.ടി.എ പ്രസിദ്ധീകരിച്ചു. പരീക്ഷാര്‍ഥികള്‍ക്ക് അവരുടെ ആപ്ലിക്കേഷന്‍ നമ്പറും പാസ്വേഡും ഉപയോഗിച്ച് ലോഗിന്‍ചെയ്ത് തങ്ങള്‍ക്ക് അനുവദിച്ചിട്ടുള്ള പരീക്ഷാകേന്ദ്രം ഏതാണെന്ന് മനസ്സിലാക്കാന# സാധിക്കും. അതേസമയം, ഇപ്പോള്‍ നല്‍കിയിരിക്കുന്നത് അഡ്മിറ്റ് കാര്‍ഡ് അല്ലെന്നും പരീക്ഷാ കേന്ദ്രം ഏത് നഗരത്തിലാണെന്ന് അറിയിക്കാന്‍ മാത്രമുള്ളതാണെന്നും എന്‍.ടി.എ വ്യക്തമാക്കിയിട്ടുണ്ട്. അഡ്മിറ്റ് കാര്‍ഡുകള്‍ വരും ദിവസങ്ങളില്‍ ലഭ്യമാവും.

ഇന്ത്യയിലെ 551 നഗരങ്ങളിലും വിദേശത്തെ 14 നഗരങ്ങളിലുമായി പെന്‍ ആന്‍ഡ് പേപ്പര്‍ രീതിയിലാണ് പരീക്ഷ.  ഉച്ചക്ക് രണ്ടുമണി മുതല്‍ വൈകിട്ട് 5.15 വരെയാണ് പരീക്ഷാ സമയം.