ചങ്ങരംകുളം: സ്വകാര്യ കമ്പനിക്കായി റോഡരികില്‍ കീറിയ കാനകള്‍ ദുരിതം വിതക്കുന്നു. പാലക്കാട്-മലപ്പുറം ജില്ലകളെ ബന്ധിപ്പിക്കുന്ന പ്രവൃത്തികളാണ് ഇപ്പോള്‍ നടന്നുകൊണ്ടിരിക്കുന്നത്. എന്നാല്‍ കാന കീറിയതു മൂടിയതിനു ശേഷം കഴിഞ്ഞ ദിവസം മഴ പെയ്തതോടെയാണ് പല കാനകളിലും മണ്ണുകള്‍ താഴുകയും വെള്ളം കെട്ടിക്കിടക്കുകയും ചെയ്തത്.
പല ഭാഗങ്ങളിലും വീടുകള്‍ക്ക് മുന്നില്‍ വന്‍ ഗര്‍ത്തങ്ങളാണ് രൂപപ്പെട്ടിരിക്കുന്നത്. ഇതുകാരണം വാഹനങ്ങള്‍ പല വീടുകളിലേക്കും കൊണ്ടുപോകാന്‍ പറ്റാത്ത സ്ഥിതിയാണ്.
പലയിടത്തും വാട്ടര്‍ അതോററ്റിയുടെ പൈപ്പ്‌ലൈനും ബി.എസ്.എന്‍.എല്‍ കേബിളും തകര്‍ത്താണ് കാന കീറിയിട്ടുള്ളത്. ഇതുമൂലം നിരവധി വീട്ടുകാരും ബുദ്ധിമുട്ടിലായിരിക്കുകയാണ്.