തിരുവനന്തപുരം: പ്ലസ് വൺ പ്രവേശനത്തിനുള്ള ട്രയൽ അലോട്ട്‌മെന്റ് ലിസ്റ്റ് പ്രസിദ്ധീകരിച്ചു. 4,43,984 അപേക്ഷകളിൽ 2,44,796 സീറ്റുകളിലേക്കാണ് അലോട്ട്‌മെന്റ് നൽകിയിരിക്കുന്നത്. ഭിന്നശേഷി വിഭാഗത്തിനായുള്ള സീറ്റുകൾ ഉൾപ്പെടെ 3,17,016 സീറ്റുകളിലേക്കാണ് ട്രയൽ അലോട്ട്‌മെന്റ്. ഇനി 72,220 സീറ്റുകൾ ഒഴിഞ്ഞുകിടക്കുന്നുണ്ട്.  

ജനറൽ വിഭാഗത്തിൽ 1,56,055 സീറ്റുകളിൽ 1,55,999 സീറ്റുകളാണ് അലോട്ട് ചെയ്തത്. 56 സീറ്റുകളിൽ ഒഴിവുണ്ട്. മുസ് ലിം വിഭാഗത്തിൽ ആകെ 13,912 സീറ്റുകളാണ് ഉള്ളത്. ഇതിൽ 13,581 സീറ്റുകളിലേക്ക് അലോട്ട്‌മെന്റ് നടന്നു. 331 സീറ്റുകൾ ഒഴിവുണ്ട്. www.hscap.kerala.gov.in എന്ന വെബ്‌സൈറ്റിൽ നാളെ വൈകിട്ട് അഞ്ച് മണി വരെ ട്രയൽ അലോട്ട്‌മെന്റ് പരിശോധിക്കാം. തിരുത്തലുകൾ ആവശ്യമെങ്കിൽ കാൻഡിഡേറ്റ് ലോഗിനിലെ എഡിറ്റ് ആപ്ലിക്കേഷൻ എന്ന ലിങ്കിലൂടെ നാളെ വൈകിട്ട് 5 നുള്ളിൽ ഫൈനൽ കൺഫർമേഷൻ നൽകണം. മുഖ്യ അലോട്ട്‌മെന്റ് 15 ന് പ്രസിദ്ധീകരിക്കും.