ഒരു കളിക്കാരൻ തന്റെ കരിയറിലെ ഏറ്റവും വലിയ സ്വപ്നമായ ലോകകപ്പ് വേദിയിലേക്ക് നടന്നു കയറുന്നത് കടുത്ത പനിയുമായിട്ടാണെങ്കിലോ? മെക്‌സിക്കോയിലെ ഗ്വാഡലഹാര സ്റ്റേഡിയത്തിൽ ചെക്ക് റിപ്പബ്ലിക്കിനെതിരെ ദക്ഷിണ കൊറിയ 2-1ന് നേടിയ ആവേശകരമായ അട്ടിമറി വിജയത്തിന് പിന്നിൽ അങ്ങനെയൊരു ഹൃദയസ്പർശിയായ കഥയുണ്ട്.

മത്സരത്തിന് മണിക്കൂറുകൾക്ക് മുൻപ് കൊറിയൻ ക്യാമ്പ് വലിയ ആശങ്കയിലായിരുന്നു. പകരക്കാരനായി ഇറങ്ങേണ്ടിയിരുന്ന യുവ മുന്നേറ്റതാരം ഓ ഹിയോൺ ഗ്യൂവിന് കടുത്ത പനി ബാധിച്ചു. ശരീര താപനില 38 ഡിഗ്രി സെൽഷ്യസ് (100.4 ഡിഗ്രി ഫാരൻഹീറ്റ്) വരെ ഉയർന്നു. ശാരീരികമായി പൂർണ്ണ ആരോഗ്യവാനല്ലായിരുന്നിട്ടും, രാജ്യത്തിന് വേണ്ടി കളത്തിലിറങ്ങണമെന്ന അവന്റെ ആഗ്രഹത്തിന് മുന്നിൽ കോച്ച് ഹോങ് മ്യുങ്‌ബോയ്ക്ക് സമ്മതം മൂളേണ്ടി വന്നു.  

ALSO READ: ആ ഭാരമിറക്കാൻ സ്വന്തം കാണികൾക്ക് മുന്നിലെങ്കിലും ജയിക്കണം, കാനഡയ്ക്ക്

കളിക്കളത്തിലെ മാജിക്

മത്സരത്തിന്റെ 59ാം മിനിറ്റിൽ ചെക്ക് റിപ്പബ്ലിക് ക്യാപ്റ്റൻ ലാഡിസ്ലാവ് ക്രെജ്‌സിയിലൂടെ മുന്നിലെത്തിയപ്പോൾ കൊറിയൻ ആരാധകർ നിശ്ശബ്ദരായി. എന്നാൽ എട്ട് മിനിറ്റുകൾക്കപ്പുറം ഹ്വാങ് ഇൻബിയോമിലൂടെ കൊറിയ സമനില പിടിച്ചു.
കഥ മാറുന്നത് 80ാം മിനിറ്റിലാണ്. പനിയോട് പോരാടി ബെഞ്ചിലിരുന്ന ഓ ഹിയോൺ ഗ്യൂ ഒടുവിൽ പകരക്കാരനായി മൈതാനത്തേക്ക് എത്തി. ശാരീരിക ബുദ്ധിമുട്ടുകൾ മറന്ന് പന്തിന് പിന്നാലെ പാഞ്ഞ അവൻ, ഹ്വാങ് ഇൻബിയോം ബോക്‌സിലേക്ക് നീട്ടിനൽകിയ പന്ത് കൃത്യമായി ചെക്ക് വലയിലെത്തിച്ചു!

    'എന്റെ വികാരങ്ങൾ വാക്കുകളാൽ വിവരിക്കാൻ എനിക്ക് കഴിയില്ല. കടുത്ത പനിയുണ്ടായിരുന്നിട്ടും രാജ്യത്തിന്റെ വിജയത്തിനായി ഗോൾ നേടാൻ കഴിഞ്ഞത് ഒരു സ്വപ്നം പോലെ തോന്നുന്നു' - മത്സരശേഷം വികാരാധീനനായി ഓ ഹിയോൺ ഗ്യൂ പറഞ്ഞു.
ഈ വിജയത്തോടെ ഗ്രൂപ്പ് എയിൽ ആതിഥേയരായ മെക്‌സിക്കോയ്ക്ക് പിന്നിൽ 3 പോയിന്റുമായി ദക്ഷിണ കൊറിയ രണ്ടാം സ്ഥാനത്തുണ്ട്. കളി അവസാനിച്ചതിന് ശേഷം കൊറിയൻ താരങ്ങൾ സ്റ്റേഡിയത്തിലെ ആരാധകർക്കൊപ്പം ഈ ചരിത്ര വിജയം സെൽഫിയെടുത്താണ് ആഘോഷിച്ചത്. തോൽക്കാൻ മനസ്സില്ലാത്ത ഒരു കൂട്ടം യുവാക്കളുടെ പോരാട്ടവീര്യത്തിന്റെ പ്രതീകമായി ഈ മത്സരം മാറി.