തിരുവനന്തപുരം: സംസ്ഥാനത്തിന്റെ സാമ്പത്തിക-വ്യാവസായിക ഭൂപടം പാടെ മാറ്റിമറിക്കാൻ പോകുന്ന ബൃഹത്തായ 'മിഷൻ സമുദ്ര' പദ്ധതിയുമായി പുതിയ യുഡിഎഫ് സർക്കാർ മുന്നോട്ട്. വി.ഡി സതീശൻ സർക്കാരിന്റെ ആദ്യ ബജറ്റിൽ തന്നെ മിഷൻ സമുദ്ര പദ്ധതിക്ക് 400 കോടി രൂപ വകയിരുത്താൻ സർക്കാർ തീരുമാനിച്ചു.

ALSO READ: മലബാറിന് കായിക കുതിപ്പ്; അന്താരാഷ്ട്ര നിലവാരത്തിൽ ഫുട്ബോൾ സ്റ്റേഡിയത്തിനായി ബജറ്റിൽ 50 കോടി രൂപ വകയിരുത്തി

കേരളത്തിന്റെ 600 കിലോമീറ്റർ നീളമുള്ള തീരദേശത്തെയും തുറമുഖങ്ങളെയും പരസ്പരം ബന്ധിപ്പിച്ച് സംസ്ഥാനത്തെ ഒരു ആഗോള മാരിടൈം ഹബ്ബാക്കി (Global Maritime Hub) മാറ്റുകയാണ് പദ്ധതിയുടെ പ്രധാന ലക്ഷ്യം. മുഖ്യമന്ത്രി വി.ഡി. സതീശന്റെ പ്രത്യേക താല്പര്യപ്രകാരം വിഭാവനം ചെയ്ത ഈ സ്വപ്ന പദ്ധതിയിലൂടെ പതിനായിരക്കണക്കിന് പുതിയ തൊഴിലവസരങ്ങളാണ് കേരളത്തിൽ സൃഷ്ടിക്കപ്പെടാൻ പോകുന്നത്.

നിലവിൽ ദുബൈയുടെ ജിഡിപിയുടെ 28 ശതമാനവും അവിടുത്തെ പോർട്ട് മേഖലയിൽ നിന്നാണ് ലഭ്യമാകുന്നത്. സമാനമായ രീതിയിൽ കേരളത്തിന്റെ കടൽ സമ്പത്തിനെ പൂർണ്ണമായും പ്രയോജനപ്പെടുത്തുകയാണ് വി.ഡി സതീശൻ മിഷൻ സമുദ്രയിലൂടെ സർക്കാർ ലക്ഷ്യമിടുന്നത്.

എന്താണ് ബ്ലൂ ഇക്കോണമി (Blue Economy)?

പരിസ്ഥിതി സംരക്ഷണത്തിന് മുൻഗണന നൽകിക്കൊണ്ട് കടൽ വിഭവങ്ങളെ സുസ്ഥിരമായി പ്രയോജനപ്പെടുത്തുന്ന സാമ്പത്തിക മാതൃകയാണിത്. സുസ്ഥിര മത്സ്യബന്ധനം, അക്വാകൾച്ചർ, മറൈൻ ബയോടെക്‌നോളജി, കപ്പൽ നിർമ്മാണം, ഗ്രീൻ പോർട്ടുകൾ എന്നിവയെല്ലാം ഇതിന്റെ ഭാഗമാണ്. ചെലവ് കുറഞ്ഞ സമുദ്രപാതകൾ യാഥാർത്ഥ്യമാകുന്നതോടെ ചരക്കുഗതാഗത ചെലവ് ഗണ്യമായി കുറയും. ഇത് നിലവിൽ ഇന്ത്യയിൽ തന്നെ ഉയർന്ന നിരക്കിലുള്ള കേരളത്തിലെ പണപ്പെരുപ്പം (Inflation) നിയന്ത്രിക്കാൻ ഏറെ സഹായകരമാകും.

പദ്ധതി മൂന്ന് ഘട്ടങ്ങളായി:

കേരളത്തെ ഒരു സമ്പൂർണ്ണ പോർട്ട് സിറ്റിയാക്കി മാറ്റുന്നതിനുള്ള മിഷൻ സമുദ്ര പദ്ധതി മൂന്ന് ഘട്ടങ്ങളായാണ് വിഭാവനം ചെയ്തിരിക്കുന്നത്:

ഒന്നാം ഘട്ടം: കേരളത്തിലെ വിഴിഞ്ഞം മുതൽ ബേപ്പൂർ വരെയുള്ള ചെറുതും വലുതുമായ തുറമുഖങ്ങളെ പരസ്പരം ബന്ധിപ്പിച്ച് തീരദേശ ചരക്കുഗതാഗതം ശക്തമാക്കും. തിരുവനന്തപുരം, കൊച്ചി തുറമുഖങ്ങൾക്ക് പുറമെ ബേപ്പൂർ തുറമുഖത്തിന്റെ സാധ്യതകളെയും ഇതിനായി പൂർണ്ണതോതിൽ വികസിപ്പിക്കുമെന്ന് ബജറ്റിൽ വി.ഡി സതീശൻ സൂചിപ്പിച്ചു. ഇത് തീരദേശ മേഖലകളിൽ താമസിക്കുന്ന നിരവധി യുവാക്കൾക്ക് വലിയ തൊഴിലവസരമൊരുക്കും.

രണ്ടാം ഘട്ടം: ക്രൂയിസ് ഷിപ്പിംഗ് യാഥാർത്ഥ്യമാക്കുന്നതോടെ അന്താരാഷ്ട്ര നിലവാരത്തിലുള്ള ടൂറിസം സാധ്യതകൾക്ക് തുടക്കമാകും.

മൂന്നാം ഘട്ടം: കടൽ വഴിയുള്ള ടൂറിസത്തെ കേരളത്തിലെ ഉൾനാടൻ നദികളുമായും കായലുകളുമായും ബന്ധിപ്പിക്കും. ഇതോടെ വിദേശ സഞ്ചാരികളുടെ വലിയൊരു ഒഴുക്ക് തന്നെ സംസ്ഥാനത്തേക്ക് ഉണ്ടാകും.

റോഡുകളിലെ തിരക്ക് പകുതിയായി കുറയും

മിഷൻ സമുദ്ര യാഥാർത്ഥ്യമാകുന്നതോടെ നിലവിൽ റോഡ് മാർഗ്ഗം നടക്കുന്ന ചരക്കുഗതാഗതത്തിന്റെ 50 ശതമാനമെങ്കിലും സമുദ്രപാതയിലേക്ക് മാറുമെന്നാണ് വിദഗ്ദ്ധർ വിലയിരുത്തുന്നത്. ഇത് സംസ്ഥാനത്തെ റോഡുകളിലെ കനത്ത തിരക്കും വാഹന അപകടങ്ങളും വായുമലിനീകരണവും ഗണ്യമായി കുറയ്ക്കാൻ സഹായിക്കും.

വിഴിഞ്ഞം അന്താരാഷ്ട്ര തുറമുഖം, കൊച്ചിൻ പോർട്ട്, കൊച്ചിൻ ഷിപ്പ്യാർഡ് എന്നിവയ്ക്ക് പുറമെ 17 ചെറുകിട തുറമുഖങ്ങളും വിപുലമായ കായൽ ശൃംഖലയും ഉണ്ടായിട്ടും ഇത്രയും കാലം ഈ സാധ്യതകൾ പ്രയോജനപ്പെടുത്താൻ കേരളത്തിന് കഴിഞ്ഞിരുന്നില്ല. വിഴിഞ്ഞം മുതൽ കാസർകോട് വരെയുള്ള തീരദേശ മേഖലകളെ ബന്ധിപ്പിച്ച് പ്രത്യേക വികസന കോറിഡോറുകൾ രൂപീകരിക്കുന്നതോടെ ഗ്രാമീണ മേഖലകളിൽ പോലും വലിയ സാമ്പത്തിക ഉണർവുണ്ടാകും.

വെല്ലുവിളികളും അതിജീവനവും 

തീരശോഷണം, കടൽ മലിനീകരണം, കാലാവസ്ഥാ വ്യതിയാനം തുടങ്ങിയ വലിയ വെല്ലുവിളികൾ പദ്ധതിക്ക് മുന്നിലുണ്ടെങ്കിലും കൃത്യമായ ആസൂത്രണത്തിലൂടെയും പരിസ്ഥിതി സൗഹൃദപരമായ സമീപനത്തിലൂടെയും ഇവയെല്ലാം മറികടക്കാൻ സാധിക്കുമെന്നാണ് സർക്കാർ കണക്കുകൂട്ടുന്നത്.

ലോജിസ്റ്റിക്‌സ്, ഹോസ്പിറ്റാലിറ്റി, ടൂറിസം, ഷിപ്പിംഗ് മേഖലകളിൽ വിപ്ലവകരമായ മാറ്റങ്ങൾ കൊണ്ടുവരുന്ന 'മിഷൻ സമുദ്ര' മികച്ച രീതിയിൽ വി.ഡി സതീശൻ സർക്കാരിന് നടപ്പിലാക്കാൻ കഴിഞ്ഞാൽ അത് കേരളത്തിന്റെ ഭാവി തന്നെ മാറ്റിമറിക്കുമെന്ന കാര്യത്തിൽ തർക്കമില്ല.

In its first state budget for 2026, the newly formed V.D. Satheesan government in Kerala has allocated ₹400 crore for a flagship initiative named 'Mission Samudra'. The ambitious project is aimed at transforming the state's coastal infrastructure, boosting the marine economy, and altering the overall face of Kerala's coastline.