മനില: ഫിലിപ്പീന്‍സിലെ ഒരു ഹൈസ്‌കൂളില്‍ പ്രായപൂര്‍ത്തിയാകാത്ത രണ്ട് പേര്‍ നടത്തിയ വെടിവെപ്പില്‍ മൂന്ന് വിദ്യാര്‍ത്ഥികള്‍ കൊല്ലപ്പെട്ടു. അഞ്ച് പേര്‍ക്ക് പരുക്കേറ്റതായി അധികൃതര്‍ അറിയിച്ചു. ലെയ്‌റ്റെ പ്രവിശ്യയിലെ ടാക്ലോബാന്‍ സിറ്റിയിലുള്ള സാന്‍ ജോസ് നാഷണല്‍ ഹൈസ്‌കൂളിലാണ് സംഭവം.

തിങ്കളാഴ്ച രാവിലെ ഒമ്പത് മണിയോടെയായിരുന്നു വെടിവെപ്പ്. ഏകദേശം 1,500ലധികം വിദ്യാര്‍ത്ഥികള്‍ പഠിക്കുന്ന സ്‌കൂളില്‍ ക്ലാസുകള്‍ നടക്കുന്നതിനിടെയാണ് പ്രതികള്‍ ക്യാമ്പസില്‍ കടന്നുകയറി വെടിയുതിര്‍ത്തത്. വെടിവെപ്പ് ആരംഭിച്ചതോടെ വിദ്യാര്‍ത്ഥികളും അധ്യാപകരും സുരക്ഷിത സ്ഥാനങ്ങളിലേക്ക് ഓടിയെത്തി.

ALSO READ: യു.എസ്- ഇറാന്‍ ചര്‍ച്ചകളില്‍ ആശാവഹമായ പുരോഗതിയെന്ന് മധ്യസ്ഥര്‍; അന്തിമ കരാറിന്റെ രൂപരേഖ ഇരുരാജ്യങ്ങളും അംഗീകരിച്ചതായും റിപ്പോര്‍ട്ട് 

പരുക്കേറ്റ അഞ്ച് വിദ്യാര്‍ത്ഥികളെ ഉടന്‍ സമീപത്തെ ആശുപത്രിയിലേക്ക് മാറ്റി. കൊല്ലപ്പെട്ട മൂന്ന് പേരും വിദ്യാര്‍ത്ഥികളാണെന്ന് പൊലിസ് സ്ഥിരീകരിച്ചു.

സംഭവസ്ഥലത്തെത്തിയ പൊലിസ് 15 വയസ്സുള്ള ഒമ്പതാം ക്ലാസ് വിദ്യാര്‍ത്ഥിയെ ക്യാമ്പസില്‍ നിന്ന് അറസ്റ്റ് ചെയ്തു. രണ്ടാമത്തെ പ്രതി പിന്നീട് പൊലിസിന് മുന്നില്‍ കീഴടങ്ങിയതായും, രക്ഷപ്പെടാന്‍ ശ്രമിക്കുന്നതിനിടെ പിടിയിലായതായും വ്യത്യസ്ത റിപ്പോര്‍ട്ടുകള്‍ പുറത്തുവന്നിട്ടുണ്ട്.

അന്വേഷണത്തിനിടെ ഒരു .38 കാലിബര്‍ റിവോള്‍വറും 9 എംഎം പിസ്റ്റളും പൊലിസ് കണ്ടെടുത്തു. ആക്രമണത്തിന് പിന്നിലെ കാരണം ഇതുവരെ വ്യക്തമായിട്ടില്ല. പ്രതികള്‍ എങ്ങനെ ആയുധങ്ങള്‍ സ്‌കൂളിനുള്ളില്‍ എത്തിച്ചു എന്നതടക്കമുള്ള കാര്യങ്ങളില്‍ അന്വേഷണം പുരോഗമിക്കുകയാണ്.

സംഭവത്തെ തുടര്‍ന്ന് സ്‌കൂള്‍ പരിസരത്ത് സുരക്ഷ ശക്തമാക്കി. സ്ഥിരീകരിക്കാത്ത വിവരങ്ങള്‍ പ്രചരിപ്പിക്കരുതെന്നും അന്വേഷണത്തിന് സഹായകരമായ വിവരങ്ങള്‍ ലഭ്യമാണെങ്കില്‍ പൊലിസിനെ അറിയിക്കണമെന്നും ഫിലിപ്പീന്‍ നാഷണല്‍ പൊലിസ് പൊതുജനങ്ങളോട് അഭ്യര്‍ഥിച്ചു.

ഫിലിപ്പീന്‍സില്‍ സ്‌കൂള്‍ വെടിവെപ്പുകള്‍ അപൂര്‍വമായതിനാല്‍, ഈ സംഭവം രാജ്യത്ത് വിദ്യാഭ്യാസ സ്ഥാപനങ്ങളിലെ സുരക്ഷയെക്കുറിച്ചുള്ള ചര്‍ച്ചകള്‍ക്ക് വീണ്ടും വഴിവെച്ചിരിക്കുകയാണ്.

Three students were killed in a shooting carried out by two minors at a high school in the Philippines. Authorities said five others were injured. The incident occurred at San Jose National High School in Tacloban City, Leyte province.