റിയാദ് : മക്കയിലെ മസ്ജിദുൽ ഹറാമിലുള്ള ഹിജ്‌റ് ഇസ്മാഈലിൽ (ഹതീം) പ്രവേശിക്കുന്നതിന് പുരുഷന്മാർക്കും സ്ത്രീകൾക്കും പ്രത്യേക സമയക്രമം ഏർപ്പെടുത്തിയിട്ടുണ്ട്. സഊദിയിലെ ഇരു ഹറം കാര്യാലയങ്ങളുടെ ചുമതലയുള്ള അതോറിറ്റിയാണ് തീർത്ഥാടകരുടെ സൗകര്യാർത്ഥം ഈ ക്രമീകരണം നടപ്പിലാക്കിയത്.

ഇതനുസരിച്ച്, ഹിജ്‌റ് ഇസ്മാഈലിൽ പ്രവേശിക്കുന്ന ഓരോ സന്ദർശകനും പരമാവധി പത്ത് മിനിറ്റ് വരെയാണ് അവിടെ ചിലവഴിക്കാൻ അനുവദിക്കുന്നത്. സന്ദർശകർക്കായി നിശ്ചയിച്ചിട്ടുള്ള പ്രവേശന സമയക്രമം താഴെ പറയുന്നതാണ്:

* പുരുഷന്മാർ: രാവിലെ എട്ട് മുതൽ പതിനൊന്ന് വരെ.

* സ്ത്രീകൾ: രാത്രി എട്ട് മുതൽ പുലർച്ചെ രണ്ട് വരെ.

തീർത്ഥാടകർക്ക് തിക്കും തിരക്കുമില്ലാതെ പ്രാർത്ഥന നിർവഹിക്കുന്നതിനും, ഈ പുണ്യസ്ഥലത്ത് എളുപ്പത്തിൽ പ്രവേശനം ഉറപ്പാക്കുന്നതിനും വേണ്ടിയാണ് അധികൃതർ ഇത്തരം നിയന്ത്രണങ്ങൾ ഏർപ്പെടുത്തിയിരിക്കുന്നത്. നിശ്ചയിച്ചിട്ടുള്ള സമയക്രമവും നിർദ്ദേശങ്ങളും കർശനമായി പാലിക്കണമെന്ന് അധികൃതർ തീർത്ഥാടകരോട് അഭ്യർത്ഥിച്ചിട്ടുണ്ട്.

English Summary: To manage crowds and ensure a smooth experience for pilgrims, Saudi authorities have introduced a separate time schedule for visiting the Hijr Ismail (Hateem) at Masjid al-Haram in Makkah. Each visitor is permitted to stay in the area for a maximum of 10 minutes. According to the designated timings, men can visit from 8:00 AM to 11:00 AM, while women are allowed entry from 8:00 PM to 2:00 AM.