കോട്ടയം: കോട്ടയം മെഡിക്കല്‍ കോളജ് ആശുപത്രിയില്‍ ഗുരുതര വീഴ്ച. ആശുപത്രി ഫാര്‍മസിയില്‍ നിന്നും മരുന്ന് മാറി നല്‍കിയെന്നാണ് പരാതി. പ്രസവശേഷം നല്‍കേണ്ട അയണ്‍ ഗുളികകള്‍ക്ക് പകരം പ്രമേഹ രോഗത്തിനുള്ള മരുന്നാണ് നല്‍കിയത്. സംഭവത്തില്‍ വൈക്കം സ്വദേശികളായ ദമ്പതികള്‍ ആശുപത്രി സൂപ്രണ്ടിനും പൊലിസിനും പരാതി നല്‍കി.

വൈക്കം സ്വദേശിനിയായ ഷൈനിയാണ് മെഡിക്കല്‍ കോളജിന്റെ അനാസ്ഥയ്ക്ക് ഇരയായത്. മെയ് 10നാണ് ഷൈനി പ്രസവിച്ചത്. തുടര്‍ന്ന് മെയ് 22ന് ആശുപത്രിയില്‍ നിന്ന് ഡിസ്ചാര്‍ജ് ചെയ്യുമ്പോള്‍ ഡോക്ടര്‍ നിര്‍ദേശിച്ച മരുന്നുകള്‍ ഫാര്‍മസിയില്‍ നിന്ന് വാങ്ങി വീട്ടിലേക്ക് മടങ്ങി. എന്നാല്‍ പ്രസവശേഷം കഴിക്കേണ്ട അയണ്‍ ഗുളികകള്‍ക്ക് പകരം പ്രമേഹ രോഗികള്‍ക്കുള്ള ഗുളികകളാണ് ലഭിച്ചതെന്നാണ് കുടുംബത്തിന്റെ പരാതി.

ALSO READ: നീറ്റ് തമിഴ്‌നാട് വിദ്യാര്‍ഥികളോട് ചെയ്യുന്ന അനീതി; ഹിന്ദി ഭാഷാ അടിച്ചേല്‍പ്പിക്കല്‍ അനുവദിക്കില്ലെന്ന് മുഖ്യമന്ത്രി വിജയ് 

മരുന്ന് മാറിക്കിട്ടിയ വിവരം അറിയാതെ 24 ദിവസത്തോളം ഷൈനി ഗുളികകള്‍ കഴിച്ചു. ഇതിനിടെ ആരോഗ്യപ്രശ്‌നങ്ങള്‍ അനുഭവപ്പെട്ടതിനെ തുടര്‍ന്ന് മറ്റൊരു സര്‍ക്കാര്‍ ആശുപത്രിയില്‍ ചികിത്സ തേടിയപ്പോഴാണ് മരുന്ന് മാറി നല്‍കിയ വിവരം തിരിച്ചറിഞ്ഞത്. ഇതോടെയാണ് മെഡിക്കല്‍ കോളജിലെ ഗുരുതര വീഴ്ച പുറത്തറിഞ്ഞത്.

സംഭവത്തില്‍ ഷൈനിയുടെ ഭര്‍ത്താവ് സനീഷ് കോട്ടയം മെഡിക്കല്‍ കോളജ് സൂപ്രണ്ടിനും ഗാന്ധിനഗര്‍ പൊലിസിലും പരാതി നല്‍കി. തങ്ങള്‍ക്ക് സംഭവിച്ച ദുരനുഭവം മറ്റൊരു കുടുംബത്തിനും ഉണ്ടാകരുതെന്നും ഉത്തരവാദികള്‍ക്കെതിരെ നടപടി സ്വീകരിക്കണമെന്നും ദമ്പതികള്‍ ആവശ്യപ്പെട്ടു.

നീതി ലഭിക്കുന്നതുവരെ നിയമപരമായി മുന്നോട്ടുപോകാനാണ് കുടുംബത്തിന്റെ തീരുമാനം. അതേസമയം, പരാതിയില്‍ അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ ബന്ധപ്പെട്ടവര്‍ക്കു നിര്‍ദേശം നല്‍കിയിട്ടുണ്ടെന്ന് കോട്ടയം മെഡിക്കല്‍ കോളജ് സൂപ്രണ്ട് അറിയിച്ചു. സംഭവത്തിന്റെ സത്യാവസ്ഥ പരിശോധിച്ച ശേഷമാകും തുടര്‍നടപടികളെന്ന് ആശുപത്രി അധികൃതര്‍ വ്യക്തമാക്കി.

The complaint is that the wrong medicine was given from the hospital pharmacy. Instead of iron tablets meant to be given after childbirth, medication for diabetes was dispensed. A couple from Vaikom has filed complaints with the hospital superintendent and the police regarding the incident.