ദോഹ: ഖത്തറിലെ റാസ് ലഫാന്‍ ദ്രവീകൃത പ്രകൃതി വാതക (എല്‍.എന്‍.ജി) സമുച്ചയത്തിലുണ്ടായ സ്‌ഫോടനത്തില്‍ മരിച്ചവരില്‍ മലയാളിയും. കോഴിക്കോട് നാദാപുരം സ്വദേശി കളരിയുള്ളതില്‍ അര്‍ജുന്‍(30) ആണ് മരിച്ചത്. 

കൊല്ലപ്പെട്ടവരില്‍ അര്‍ജുന്‍ ഉള്‍പ്പെടെ 12 ഇന്ത്യക്കാരും ഒരു പാകിസ്താന്‍ സ്വദേശിയുമാണുള്ളതെന്ന് ഖത്തര്‍ ആഭ്യന്തര മന്ത്രാലയം സ്ഥിരീകരിച്ചു. 

ഞായറാഴ്ച രാത്രി 10.30നാണ് ലോകത്തിലെ ഏറ്റവും വലിയ ദ്രവീകൃത പ്രകൃതി വാതക പ്ലാന്റില്‍ സ്‌ഫോടനം നടന്നത്. വിവിധ രാജ്യക്കാരായ 66 പേര്‍ക്ക് അപകടത്തില്‍ പരുക്കേറ്റു. ഖത്തര്‍ ഊര്‍ജ മന്ത്രാലയം അന്വേഷണം പ്രഖ്യാപിച്ചിട്ടുണ്ട്. പരുക്കേറ്റവരില്‍ ആരുടെയും നില ഗുരുതരമല്ല.

ബര്‍സാനിലെ റാസ് ലഫാന്‍ ഇന്‍ഡസ്ട്രിയല്‍ സിറ്റിയുടെ ഭാഗമായ ആഭ്യന്തര വാതക വിതരണ കേന്ദ്രത്തിന്റെ പ്രവര്‍ത്തനം പുനരാരംഭിക്കുന്നതിനിടെയാണ് അപകടമുണ്ടായതെന്ന് ഔദ്യോഗിക വൃത്തങ്ങള്‍ അറിയിച്ചു. സാങ്കേതിക കാരണങ്ങളാലാണ് സ്‌ഫോടനമെന്നാണ് ആഭ്യന്തര മന്ത്രാലയത്തിന്റെ പ്രാഥമിക വിലയിരുത്തല്‍. അപടകത്തിനു പിന്നാലെ അടിയന്തര പ്രതികരണ സേനകളും അഗ്‌നിരക്ഷാ സേനയും സ്ഥലത്തെത്തുകയും തീ നിയന്ത്രണ വിധേയമാക്കുകയും ചെയ്തു. നിരവധി മലയാളികള്‍ ജോലി ചെയ്യുന്ന ഫാക്ടറിയാണിത്.

സ്‌ഫോടനത്തെത്തുടര്‍ന്ന് പ്രദേശത്ത് വലിയ തീപിടിത്തമുണ്ടായി. പത്ത് കിലോമീറ്റര്‍ അകലെനിന്നു പോലും ആകാശത്തേക്ക് ഉയരുന്ന പുകയും അഗ്‌നിജ്വാലകളും ദൃശ്യമായിരുന്നു. കഴിഞ്ഞ മാര്‍ച്ചില്‍ ഇറാന്‍ ആക്രമണത്തില്‍ പ്ലാന്റിന് കേടുപാടുകള്‍ സംഭവിച്ചിരുന്നു. പ്ലാന്റ് അറ്റകുറ്റപ്പണിക്കു ശേഷം പുനരാരംഭിക്കുന്നതിനിടെയാണ് സ്‌ഫോടനം നടന്നത്. 2025 ഡിസംബറില്‍ പ്രവര്‍ത്തനം നിര്‍ത്തിവച്ചിരുന്നുവെന്നാണ് കമ്പനി പറയുന്നത്.

A native of Kozhikode, Kerala, was among those killed in an explosion reported in Ras Laffan, Qatar. The incident occurred at an industrial facility in the region, prompting an emergency response and an investigation into the cause of the blast.