മസ്‌കത്ത്: മേഖലയിലെ സുപ്രധാന ജലപാതയായ ഹോർമുസ് കടലിടുക്കിന്റെ പ്രവർത്തനം സംബന്ധിച്ച് ഇറാനും ഗൾഫ് രാജ്യങ്ങളും തമ്മിലുള്ള നിർണ്ണായക നയതന്ത്ര ചർച്ചകൾക്ക് വഴിതുറക്കുന്നു. ജിസിസി (GCC) രാജ്യങ്ങളും ഇറാഖും ഇറാനും തമ്മിലുള്ള പ്രാദേശിക ചർച്ചകൾക്ക് തുടക്കം കുറിക്കുന്നതിനായി ഖത്തർ പ്രധാനമന്ത്രി ശൈഖ് മുഹമ്മദ് ബിൻ അബ്ദുൾറഹ്മാൻ അൽതാനി ഒമാനിലേക്ക് പോയതായി പ്രമുഖ അന്താരാഷ്ട്ര വാർത്താ ഏജൻസിയായ എ.എഫ്.പിയോട് (AFP) ഒരു നയതന്ത്രജ്ഞൻ വ്യക്തമാക്കി.

ഇറാനും ഗൾഫ് രാജ്യങ്ങളും തമ്മിലുള്ള പ്രത്യേക അനുരഞ്ജന ചർച്ചകളും പ്രാദേശിക ഉച്ചകോടിയും സഊദിയുടെ തലസ്ഥാനമായ റിയാദിൽ വെച്ച് നടക്കുമെന്നാണ് പ്രതീക്ഷിക്കുന്നത്. എന്നാൽ ഉച്ചകോടിയുടെ കൃത്യമായ തീയതി ഇതുവരെ പ്രഖ്യാപിച്ചിട്ടില്ല.

പ്രധാന തർക്കവിഷയങ്ങൾ

ഹോർമുസ് കടലിടുക്കിലൂടെയുള്ള സുരക്ഷിതമായ ഗതാഗതം ഉറപ്പാക്കുകയാണ് ചർച്ചയുടെ പ്രധാന ലക്ഷ്യം. എന്നാൽ ഇരുവിഭാഗങ്ങൾക്കും വ്യത്യസ്തമായ ആവശ്യങ്ങളാണുള്ളതെന്ന് നയതന്ത്രജ്ഞൻ വ്യക്തമാക്കുന്നു.

ഹോർമുസ് കടലിടുക്കിലൂടെയുള്ള പൂർണ്ണമായ സഞ്ചാര സ്വാതന്ത്ര്യത്തിനായി ഗൾഫ് രാജ്യങ്ങൾ സമ്മർദ്ദം ചെലുത്തും. ഈ ജലപാതയിലൂടെയുള്ള ഗതാഗതത്തിന് യാതൊരുവിധ ഫീസും ചുമത്തരുതെന്നാണ് ഇവരുടെ ആവശ്യം. സുപ്രധാനമായ ഈ ജലപാത മുറിച്ചുകടക്കുന്ന വിമാനങ്ങളിൽ നിന്നും കപ്പലുകളിൽ നിന്നും പരിസ്ഥിതി സംരക്ഷണം, സുരക്ഷാ സേവനങ്ങൾ എന്നിവ മുൻനിർത്തി പ്രത്യേക ഫീസ് ഈടാക്കണമെന്നാണ് ഇറാൻ ആവശ്യപ്പെടുന്നത്.

യുഎസ്-ഇറാൻ ചർച്ചകളിൽ നിന്ന് തികച്ചും വ്യത്യസ്തമായ ഒരു പ്രാദേശിക കൂട്ടായ്മയാണ് ഈ ചർച്ചയിലൂടെ ലക്ഷ്യമിടുന്നത്. മുൻപ് യുഎസ്-ഇറാൻ ചർച്ചകൾക്ക് ഖത്തറിനൊപ്പം മധ്യസ്ഥത വഹിച്ച പാകിസ്ഥാനും ഈ പ്രാദേശിക ഹോർമുസ് ചർച്ചകളിൽ പങ്കാളികളാകുമെന്നാണ് സൂചന. മേഖലയിലെ മറ്റ് അയൽരാജ്യങ്ങളെക്കൂടി ഉൾപ്പെടുത്തിക്കൊണ്ട് റിയാദിൽ നടക്കുന്ന ഉച്ചകോടിയിലൂടെ ഗൾഫ്-ഇറാൻ ബന്ധത്തിൽ വലിയൊരു നയതന്ത്ര വഴിത്തിരിവ് ഉണ്ടാകുമെന്നാണ് വിലയിരുത്തപ്പെടുന്നത്.

ALSO READ: എയർബസ് A380 വിമാനങ്ങളുടെ ചിറകുകളിൽ വിള്ളൽ; 48 മണിക്കൂറിനുള്ളിൽ അടിയന്തിര പരിശോധനയുമായി എമിറേറ്റ്സ്

Saudi Arabia is likely to host reconciliation talks between Iran and Gulf nations as diplomatic efforts gather pace to resolve tensions surrounding the Strait of Hormuz. The discussions aim to enhance regional stability, maritime security, and economic cooperation in the Gulf region.