അബുദബി: യുഎഇയുടെ യാത്രാ ഗതാഗത രംഗത്ത് പുതിയൊരു സുവർണ്ണ അധ്യായം കുറിച്ചുകൊണ്ട് ഇത്തിഹാദ് റെയിലിന്റെ ആദ്യ പാസഞ്ചർ ട്രെയിൻ സർവീസ് ഔദ്യോഗികമായി ആരംഭിച്ചു. രാജ്യത്തിന്റെ ചരിത്ര നിമിഷത്തിന് സാക്ഷിയാകാൻ വൻ ജനത്തിരക്കാണ് അനുഭവപ്പെടുന്നത്. ഉദ്ഘാടന സർവീസുകൾ ആരംഭിക്കുന്നതിന് മുന്നോടിയായി തന്നെ പതിനായിരത്തിലധികം ടിക്കറ്റുകളാണ് വിറ്റുതീർന്നത്.

ഫുജൈറയ്ക്കും അബുദബിക്കും ഇടയിലുള്ള ആദ്യ ഷെഡ്യൂൾഡ് സർവീസുകളിൽ യാത്രക്കാരുടെ അഭൂതപൂർവ്വമായ തിരക്കാണ് അനുഭവപ്പെട്ടത്. ഇന്ന് പ്രാരംഭ ഘട്ടത്തിൽ ആകെ ആറ് പാസഞ്ചർ സർവീസുകളാണ് ഇത്തിഹാദ് റെയിൽ നടത്തുന്നത്.

ഇന്ന് രാവിലെ 5:34 ന് ഫുജൈറ സ്റ്റേഷനിൽ നിന്ന് പുറപ്പെട്ട കന്നി സർവീസ് രാവിലെ 7:19-നാണ് അബുദബിയിലെ മുഹമ്മദ് ബിൻ സായിദ് സിറ്റി സ്റ്റേഷനിൽ എത്തിച്ചേർന്നത്. ട്രെയിൻ പ്ലാറ്റ്‌ഫോമിൽ നിന്ന് പുറപ്പെടുന്നതിന് മുമ്പ് തന്നെ സീറ്റുകളെല്ലാം ബുക്ക് ചെയ്യപ്പെട്ടിരുന്നു.

ഏറ്റവും ആധുനികവും ഹൈടെക് സംവിധാനങ്ങളുമുള്ള യാത്രാ അന്തരീക്ഷമാണ് ട്രെയിനുകളിൽ ഒരുക്കിയിരിക്കുന്നത്:

• എല്ലാ കോച്ചുകളിലും ഉറപ്പായ ഇരിപ്പിട സൗകര്യം
• അതിവേഗ സൌജന്യ ഓൺബോർഡ് വൈ-ഫൈ
• ഓരോ സീറ്റിലും പ്രത്യേക പവർ ഔട്ട്‌ലെറ്റുകൾ
• വിപുലമായ ലഗേജ് അലവൻസുകൾ

"ദേശീയ അടിസ്ഥാന സൗകര്യങ്ങളുടെ എല്ലാ മഹത്തായ ഘടകങ്ങൾക്കും രണ്ട് തുടക്കങ്ങളുണ്ട്: അത് നിർമ്മിക്കപ്പെടുന്ന ദിവസവും, ആളുകൾ അത് ഉപയോഗിച്ച് തുടങ്ങുന്ന ദിവസവും. ഇന്ന് നമ്മൾ ആ രണ്ടാമത്തെ ചരിത്രപരമായ തുടക്കത്തിലേക്ക് കടക്കുകയാണ്. ഫുജൈറയിൽ നിന്നുള്ള ഈ ആദ്യ യാത്ര രാജ്യത്തിന്റെ ഒരു വലിയ ദർശനം ദൈനംദിന ജീവിതത്തിന്റെ ഭാഗമായി മാറുന്ന നിമിഷമാണ്." ഇത്തിഹാദ് റെയിൽ ചീഫ് ഓപ്പറേറ്റിംഗ് ഓഫീസറായ അസ്സ അൽസുവൈദി വ്യക്തമാക്കി.

തുടർ യാത്രകൾ സുഗമമാക്കാൻ അബുദബി മൊബിലിറ്റി

ട്രെയിൻ യാത്രക്കാർക്ക് സ്റ്റേഷനുകളിൽ നിന്ന് മറ്റ് സ്ഥലങ്ങളിലേക്ക് സുഗമമായി പോകുന്നതിനായി അബുദബി ഇന്റഗ്രേറ്റഡ് ട്രാൻസ്‌പോർട്ട് സെന്ററുമായി (അബുദബി മൊബിലിറ്റി) ഇത്തിഹാദ് റെയിൽ കൈകോർത്തിട്ടുണ്ട്. ട്രെയിൻ ശൃംഖലയെ അബുദാബിയുടെ ബസ്, ടാക്സി തുടങ്ങിയ പൊതുഗതാഗത സംവിധാനങ്ങളുമായി പൂർണ്ണമായും സംയോജിപ്പിച്ചിട്ടുണ്ട്.

യാത്രക്കാർ ട്രെയിനിൽ നിന്ന് ഇറങ്ങുമ്പോൾ അവരുടെ യാത്ര അവസാനിക്കുന്നില്ലെന്നും, അന്തിമ ലക്ഷ്യസ്ഥാനത്ത് സുരക്ഷിതമായി എത്തുന്നതുവരെ ആവശ്യമായ കണക്റ്റിവിറ്റി ഉറപ്പാക്കിയിട്ടുണ്ടെന്നും ഇന്റഗ്രേറ്റഡ് ട്രാൻസ്‌പോർട്ട് സെന്റർ ആക്ടിംഗ് ഡയറക്ടർ ജനറൽ ഡോ. അബ്ദുള്ള ഹമദ് അൽ ഗ്ഫെലി വ്യക്തമാക്കി.

ALSO READ: യുഎഇയില്‍ ചൂട് കനക്കും; ഈ ആഴ്ച 46 ഡിഗ്രി സെല്‍ഷ്യസ് വരെ ഉയരും 

Etihad Rail has launched its first passenger service, marking a historic milestone for the UAE railway network. More than 10,000 tickets have already been sold ahead of operations.