കണ്ണൂര്‍: കണ്ണൂര്‍ സര്‍വകലാശാലയില്‍ ഒരു മാസം മുമ്പ് ഉദ്ഘാടനം ചെയ്ത ആര്‍ട്ട് ഗാലറിയിലും കൈത്തറി മ്യൂസിയത്തിലും വന്‍ ക്രമക്കേട് നടന്നതായി ആരോപണം. ജൂണ്‍ ഒന്നിന് നടന്ന പ്രൗഢഗംഭീരമായ ഉദ്ഘാടനത്തിന് പിന്നാലെ ഗാലറിയില്‍ പ്രദര്‍ശിപ്പിച്ചിരുന്ന മിക്ക പുരാവസ്തുക്കളും അപൂര്‍വ്വ വസ്തുക്കളും കാണാതായിരിക്കുകയാണ്. നിലവില്‍ തെയ്യത്തിന്റെ ഒരു രൂപം മാത്രമാണ് ഇവിടെ അവശേഷിക്കുന്നത്. കൂടാതെ, ഗവര്‍ണര്‍ സ്ഥാപിച്ച ശിലാഫലകം പോലും ഇളക്കിമാറ്റിയ നിലയിലാണ്.

ഫോക്‌ലോര്‍ അക്കാദമിയുമായി സഹകരിച്ച് സര്‍വകലാശാലയുടെ താവക്കര ക്യാമ്പസിലെ ഗുണ്ടര്‍ട്ട് ലൈബ്രറിയിലാണ് ആര്‍ട്ട് ഗാലറിയും മ്യൂസിയവും സജ്ജീകരിച്ചിരുന്നത്. എന്നാല്‍ ഉദ്ഘാടന ചടങ്ങ് കഴിഞ്ഞതോടെ ഇവിടുത്തെ സാധനങ്ങളെല്ലാം അപ്രത്യക്ഷമായത് വലിയ വിവാദത്തിന് വഴിവച്ചിരിക്കുകയാണ്. ഉദ്ഘാടനത്തിന് വേണ്ടി മാത്രം താല്‍ക്കാലികമായി ഒരുക്കിയതാണോ ഇതെന്ന സംശയമാണ് ഉയരുന്നത്.

അതേസമയം, ആര്‍ട്ട് ഗാലറിയിലും മ്യൂസിയത്തിലും നവീകരണ പ്രവര്‍ത്തനങ്ങള്‍ പുരോഗമിക്കുന്നതിനാലാണ് വസ്തുക്കള്‍ മാറ്റിയതെന്നാണ് സര്‍വകലാശാല അധികൃതരുടെ വിശദീകരണം. എന്നാല്‍ ഉദ്ഘാടനം കഴിഞ്ഞ് ദിവസങ്ങള്‍ക്കകം എന്ത് നവീകരണമാണ് ഇവിടെ നടത്താനുള്ളതെന്ന ചോദ്യവുമായി വിദ്യാര്‍ത്ഥികളും പൊതുജനങ്ങളും രംഗത്തെത്തിയിട്ടുണ്ട്.

A major scam is suspected at Kannur University as most artifacts from the newly inaugurated art gallery and handloom museum have gone missing within a month of its opening.