കാസര്‍കോട്: എയിംസ് പരിഗണനാ പട്ടികയില്‍ കാസര്‍കോടിനെയും ഉള്‍പ്പെടുത്തുമെന്ന് മുഖ്യമന്ത്രിയുടെയും ആരോഗ്യമന്ത്രിയുടെയും ഉറപ്പ് ലഭിച്ചതായി എയിംസ് കാസര്‍കോട് ജനകീയ കൂട്ടായ്മ അറിയിച്ചു. ആരോഗ്യരംഗത്ത് പിന്നാക്കം നില്‍ക്കുന്ന കാസര്‍കോടിന് ഉന്നത ചികിത്സാ കേന്ദ്രമായ എയിംസ് ലഭിക്കുമെന്ന വലിയ പ്രതീക്ഷയിലാണ് ജില്ലയിലെ ജനങ്ങളും ജനകീയ കൂട്ടായ്മയും.

ഉന്നത ചികിത്സാ കേന്ദ്രമായ എയിംസ് കാസര്‍കോട് ജില്ലയില്‍ സ്ഥാപിക്കണമെന്ന ആവശ്യം വര്‍ഷങ്ങളായി ശക്തമായി ഉയര്‍ന്നുവരുന്നതാണ്. ഈ ആവശ്യവുമായി ബന്ധപ്പെട്ട് എയിംസ് കാസര്‍കോട് ജനകീയ കൂട്ടായ്മയുടെ നേതൃത്വത്തില്‍ നിരവധി സമരങ്ങളും പ്രതിഷേധ പരിപാടികളും സംഘടിപ്പിച്ചിരുന്നു. സംസ്ഥാനകേന്ദ്ര സര്‍ക്കാരുകള്‍ക്ക് നിവേദനങ്ങളും സമര്‍പ്പിച്ചിരുന്നു. എന്നാല്‍ ഇതുവരെ എയിംസ് പരിഗണനാ പട്ടികയില്‍ കാസര്‍കോടിന്റെ പേര് ഉള്‍പ്പെടുത്തണമെന്ന ആവശ്യം എല്‍.ഡി.എഫ് സര്‍ക്കാര്‍ പരിഗണിച്ചിരുന്നില്ലെന്നാണ് കൂട്ടായ്മയുടെ ആരോപണം.

ALSO READ: പ്രതിപക്ഷ ഉപനേതൃപദവി: 'ഒരടി പോലും പിന്നോട്ടില്ല'; പിണറായിക്കും സി.പി.എമ്മിനുമെതിരേ രൂക്ഷ വിമര്‍ശനവുമായി സി.പി.ഐ 

പുതിയ സര്‍ക്കാര്‍ അധികാരത്തിലെത്തിയതോടെയാണ് കാസര്‍കോടിനെയും എയിംസ് പരിഗണനാ പട്ടികയില്‍ ഉള്‍പ്പെടുത്താനുള്ള നടപടികള്‍ ആരംഭിച്ചതെന്ന് ജനകീയ കൂട്ടായ്മ അറിയിച്ചു. ജില്ലയിലെ പെരിയയെ ഉള്‍പ്പെടുത്തി പുതുക്കിയ പട്ടിക കേന്ദ്രസര്‍ക്കാരിന് കൈമാറാനാണ് സംസ്ഥാന സര്‍ക്കാരിന്റെ തീരുമാനമെന്നും കൂട്ടായ്മ വ്യക്തമാക്കി.

എയിംസ് കാസര്‍കോടിന് അനുവദിക്കണമെങ്കില്‍ കേന്ദ്രസര്‍ക്കാരിനുമേല്‍ എല്ലാ രാഷ്ട്രീയ കക്ഷികളും ജനപ്രതിനിധികളും പൊതുസമൂഹവും ഒരുമിച്ച് സമ്മര്‍ദ്ദം ചെലുത്തേണ്ടതുണ്ടെന്ന് ജനകീയ കൂട്ടായ്മ ആവശ്യപ്പെട്ടു. ജില്ലയുടെ ആരോഗ്യരംഗം നേരിടുന്ന അടിസ്ഥാന പ്രശ്‌നങ്ങള്‍ക്ക് സ്ഥിരമായ പരിഹാരം കാണാന്‍ എയിംസ് നിര്‍ണായകമാകുമെന്നും, വിദഗ്ധ ചികിത്സയ്ക്കായി മറ്റ് ജില്ലകളെയും സംസ്ഥാനങ്ങളെയും ആശ്രയിക്കേണ്ട സാഹചര്യം ഇതിലൂടെ ഒഴിവാകുമെന്നും കൂട്ടായ്മ പ്രത്യാശ പ്രകടിപ്പിച്ചു.

The AIIMS Kasaragod Janakeeya Koottayma said they have received assurance from the Chief Minister and the Health Minister that Kasaragod will also be included in the list of places being considered for AIIMS.People of the district and the Janakeeya Koottayma are holding out strong hope that Kasaragod, which lags behind in healthcare, will get AIIMS as a high-level treatment center.