തൃശൂര്‍: നഗരത്തില്‍ നിറഞ്ഞാടിയ പുലിക്കളിയില്‍ മനം നിറഞ്ഞ് ജനങ്ങളും. തീക്കണ്ണുള്ള പുലികളേയും വായില്‍ നിന്നും തീ തുപ്പുന്ന പുലികളേയും കാണാന്‍ വന്‍ജനക്കൂട്ടമാണ് ഇന്നലെ തൃശൂരിലെത്തിയത്. പൂരം കഴിഞ്ഞുള്ള പൂരത്തിരക്കായിരുന്നു ഇന്നലെ രാവിലെ മുതല്‍ നഗരത്തില്‍ അനുഭവപ്പെട്ടത്. ഉയരമുള്ള കെട്ടിടങ്ങളില്‍ കയറി സ്ത്രീകള്‍ അടക്കമുള്ള കുടുംബങ്ങള്‍ തങ്ങളുടെ സ്ഥാനം നേരത്തെത്തന്നെ ഉറപ്പിച്ചു. കുട്ടിപ്പുലികളും പുള്ളിപ്പുലികളും വരയന്‍പുലികളും കരിമ്പുലികളും ചേര്‍ന്ന് നഗരത്തെ ഇളക്കിമറിക്കുന്ന കാഴ്ച്ച മനസ്സിലേയ്ക്ക് ആവാഹിക്കാന്‍.
പുലിക്കളി കാണുന്നതിനേക്കാളും കാഴ്ച്ചക്കാര്‍ക്കിഷ്ടം അരമണികിലുക്കിയും വയര്‍ കുലുക്കിയുമുള്ള പുലികളെ മൊബൈല്‍ കാമറകളില്‍ പകര്‍ത്താനായിരുന്നു. പുലികള്‍ക്കൊപ്പമുള്ള സെല്‍ഫി സ്വന്തമാക്കാനായി സെല്‍ഫി സ്റ്റിക്കുമായാണ് പലരുമെത്തിയത്.