കോതമംഗലം: ഇടമലയാര്‍ ആനവേട്ട കേസുമായി ബന്ധപ്പെട്ട് രജിസ്റ്റര്‍ ചെയ്ത കേസില്‍ ഒളിവിലായിരുന്ന പ്രതി അറസ്റ്റില്‍. വാരിയം ആദിവാസി കുടിയിലെ ശ്രീനിവാസന്‍ (39)ആണ് പിടിയിലായത്. ഇടമലയാര്‍ റെയ്ഞ്ചിലെ പെരുവംമൂഴി ഫോറസ്റ്റ് സ്റ്റേഷനില്‍ രജിസ്റ്റര്‍ ചെയ്ത കേസിലെ ഒന്നാം പ്രതിയാണിയാളെന്ന് വനപാലകര്‍ പറഞ്ഞു.
ഇടമലയാര്‍ വനത്തില്‍നിന്നും ചെരിഞ്ഞ ആനയുടെ കൊമ്പുകള്‍ ശ്രീനിവാസന്റെ ജ്യേഷ്ഠന് ലഭിക്കുകയും ശ്രീനിവാസന്‍ ഇത് കേസിലെ പ്രധാന പ്രതികളിലൊരാളായ കുട്ടമ്പുഴ സ്വദേശി സുകുവിന് 14000 രൂപക്ക് വില്‍പന നടത്തുകയുമായിരുന്നു. അന്വേഷണ സംഘം കൊമ്പുകച്ചവടത്തിലെ ഇടനിലക്കാരെ ചോദ്യം ചെയ്തപ്പോള്‍ ലഭിച്ച വിവരത്തിന്റെ അടിസ്ഥാനത്തിലാണ് ഇയാളെ പ്രതിചേര്‍ത്തത്.
ഇതിനെ തുടര്‍ന്ന് ഒളിവില്‍ പോയ ശ്രീനിവാസന്‍ വനത്തിലും വിവിധ ആദിവാസികുടികളിലും ഒരു വര്‍ഷത്തിലേറെയായി ഒളിവില്‍ കഴിയുകയായിരുന്നു. ഇടയ്ക്ക് ഇയാള്‍ വാരിയത്ത് വന്നു പോകുന്നുവെന്ന വിവരത്തെ തുടര്‍ന്ന് ഇടമലയാര്‍ റെയ്ഞ്ച് ഓഫിസര്‍ ജോജി ജെയിംസിന്റെ നേതൃത്വത്തില്‍ വനപാലകര്‍ അറസ്റ്റ് ചെയ്യുകയായിരുന്നു.