കാളികാവ്: അടയ്ക്കാകുണ്ടിലെ എ.പി ബാപ്പുഹാജിക്കിനി തറവാടിന്റെ പൂമുഖത്തിരുന്നാല്‍ കേള്‍ക്കാവുന്നത് കിതാബുകള്‍ ചൊല്ലിക്കൊടുക്കുന്നതും പഠിക്കുന്നതും മാത്രം. ബാപ്പുഹാജി ദാനം ചെയ്ത വീട്ടുമുറ്റം ഉള്‍പ്പെടെയുള്ള 15 ഏക്കര്‍ ഭൂമിയില്‍ പണികഴിപ്പിച്ച വിജ്ഞാന കേന്ദ്രത്തില്‍ ഇന്നു പഠനാരംഭം കുറിക്കും.

അന്താരാഷ്ട്ര ഇസ്‌ലാമിക് യൂനിവേഴ്‌സിറ്റീസ് ലീഗ് അംഗത്വത്തോടെ മതഭൗതിക വിദ്യാഭ്യാസ രംഗത്തു മാതൃകാപരമായി മുന്നേറുന്ന അക്കാദമിക് ബോഡി സി.ഐ.സി.ക്കു കീഴില്‍ വളാഞ്ചേരി ആസ്ഥാനമായി പ്രവര്‍ത്തിക്കുന്ന മത ഭൗതിക വിദ്യാഭ്യാസ കേന്ദ്രമായ വാഫി കോളജിനാണു ബാപ്പു ഹാജിയുടെ ഭൂമി കൈമാറിയിട്ടുള്ളത്. വാഫി കോളജിന്റെ ബിരുദാനന്തര ബിരുദ കേന്ദ്രമായിട്ടാണു അടയ്ക്കാകുണ്ടിലെ കാംപസ് പ്രവര്‍ത്തനം തുടങ്ങുന്നത്.
മക്കളില്ലാത്ത 70 വയസ് പിന്നിട്ട ബാപ്പുഹാജി രണ്ടു വര്‍ഷം മുമ്പാണ് ഭൂമി ദാനം ചെയ്യാനുള്ള സന്നദ്ധത ഹൈദരലി ശിഹാബ് തങ്ങളെ അറിയിച്ചത്. ഇതോടൊപ്പം തന്നെ വാഫി കോളജിന് നല്‍കിയ സ്ഥലത്തിന് എതിര്‍വശത്തു മൂന്നേക്കര്‍ സ്ഥലത്ത് ബാപ്പു ഹാജി അശരണര്‍ക്കായി മറ്റൊരു സംരംഭവും ആരംഭിച്ചിട്ടുണ്ട്. ഉറ്റവരും ഉടയവരും പുറന്തള്ളുന്ന വൃദ്ധര്‍ക്കു സുരക്ഷിത ഭവനം ഒരുക്കുകയാണിവിടെ.

കുട്ടികളുടെ ബഹളത്തോടൊപ്പം കഴിയാന്‍ ആഗ്രഹിക്കുന്ന അദ്ദേഹം മിക്ക സമയവും വീടിന്റെ വടക്കു ഭാഗത്തുള്ള ക്രസന്റ് ഹയര്‍ സെക്കന്‍ഡറി സ്‌കൂളിലാണു ചെലവഴിക്കാറുള്ളത്. 1974ല്‍ ബാപ്പുഹാജി ആരംഭിച്ച സ്‌കൂളില്‍ ഇപ്പോള്‍ 3000ത്തില്‍പ്പരം കുട്ടികളുണ്ട്. വീട്ടുമുറ്റത്തു കലാലയം തുടങ്ങുന്നതോടെ വല്ലാത്ത സംതൃപ്തിയാണു നല്‍കുന്നതെന്നു ബാപ്പു ഹാജി പറഞ്ഞു.

അശരണര്‍ക്കായി നിര്‍മിക്കുന്ന ഹിമ സ്‌നേഹ ഭവനത്തിന്റെ പ്രവര്‍ത്തനം തുടങ്ങുക കൂടി ചെയ്താല്‍ ജീവിതത്തില്‍ ഒരു ആഗ്രഹവും അവശേഷിക്കുന്നില്ല എന്നു ബാപ്പു ഹാജി പറഞ്ഞു. സ്‌നേഹ ഭവനമായ ഹിമയുടെ അവസാന മിനുക്കു പണികളാണു നടന്നുകൊണ്ടിരിക്കുന്നത്. ഉദ്ഘാടനത്തിനെത്തുന്ന പാണക്കാട് ഹൈദരലി ശിഹാബ് തങ്ങള്‍ ഹിമ സന്ദര്‍ശിച്ചു പ്രവര്‍ത്തനം തുടങ്ങുന്നതുള്‍പ്പെടെയുള്ള കാര്യങ്ങള്‍ തീരുമാനിക്കുമെന്നും അദ്ദേഹം പറഞ്ഞു.
അന്താരാഷ്ട്ര നിലവാരമുള്ള അടിസ്ഥാന സൗകര്യങ്ങളാണു വാഫി കാമ്പസില്‍ ഒരുക്കിയിരിക്കുന്നത്. വിവിധ വാഫി കോളജുകളില്‍ നിന്നു ഡിഗ്രി തലം പൂര്‍ത്തിയാക്കിയ 78 വിദ്യാര്‍ഥികളാണ് ഉപരിപഠനത്തിന് ഇന്ന് ആരംഭം കുറിക്കുന്നത്. ഇന്ന് വൈകുന്നേരം നാലിനു സി.ഐ.സി റെക്ടര്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം നിര്‍വഹിക്കും. സമസ്ത കേരള ജംഇയ്യത്തുല്‍ ഉലമ പ്രസിഡന്റ് എ.പി മുഹമ്മദ് മുസ്‌ലിയാര്‍, ജനറല്‍ സെക്രട്ടറി പ്രൊഫസര്‍ കെ.ആലിക്കുട്ടി മുസ്‌ലയാര്‍, ട്രഷറര്‍ ജിഫ്രി മുത്തുക്കോയ തങ്ങള്‍ തുടങ്ങിയ പ്രമുഖ പണ്ഡിതരും ജനപ്രതിനിധികളും പങ്കെടുക്കും.