മുക്കം: നിര്‍ദിഷ്ട കൊച്ചി മംഗലാപുരം വാതക പൈപ്പ്‌ലൈനിനെതിരേ പ്രതിഷേധം വീണ്ടും ശക്തമാകുന്നു. പൈപ്പ്‌ലൈന്‍ ജനവാസ മേഖലയില്‍ നിന്നു മാറ്റിസ്ഥാപിക്കണമെന്നാവശ്യപ്പെട്ട് കാരശ്ശേരിയില്‍ ആക്ഷന്‍ കമ്മിറ്റിയുടെ നേതൃത്വത്തില്‍ ഇന്ന് കക്കാട് വില്ലേജ് ഓഫിസിനു മുന്നില്‍ പ്രതിഷേധറാലിയും ധര്‍ണയും നടത്തുമെന്നു ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. ധര്‍ണ ജോര്‍ജ് എം. തോമസ് എം.എല്‍.എ ഉദ്ഘാടനം ചെയ്യും. ഗ്രാമപഞ്ചായത്ത് പ്രസിഡന്റ് വി.കെ വിനോദ്, ജില്ലാ പഞ്ചായത്തംഗം സി.കെ കാസിം പങ്കെടുക്കും.
വാര്‍ത്താസമ്മേളനത്തില്‍ ജി. അബ്ദുല്‍ അക്ബര്‍, സി. അബ്ദുറഹ്മാന്‍ മാസ്റ്റര്‍, മുഹമ്മദ് ഇസ്‌ലാഹി, നടുക്കണ്ടി അബൂബക്കര്‍, പി.കെ റഹ്മത്ത്, സി.കെ ഷമീര്‍ പങ്കെടുത്തു.