തൊടുപുഴ:  തസ്‌ക്കര ശല്യം അനുദിനം വര്‍ധിച്ചുവരുമ്പോഴും അധികൃതര്‍ മുഖംതിരിച്ച് നില്‍ക്കുന്നതിനാല്‍ കള്ളന്മാരെ തുരത്താന്‍ പുതിയ സംവിധാനവുമായി നാട്ടുകാര്‍ രംഗത്ത്.  സിസി ടിവി കാമറ പിടിപ്പിച്ചിട്ടും രക്ഷയില്ലാതെ വന്നതോടെയാണ് വഴിത്തല സ്‌നേഹതീരം റസിഡന്‍സ് അസോസിയേഷന്റെ നേതൃത്വത്തില്‍ നാട്ടുകാര്‍ വിസിലുമായി രംഗത്തിറങ്ങുന്നത്.
അസോസിയേഷനിലെ വീടുകളുടെ പരിസരത്ത് ഇനി മോഷ്ടാക്കളെത്തിയാല്‍  വീടുകളില്‍ നിന്നും പൊലിസ് വിസില്‍ മുഴങ്ങും.  വിസിലിന്റെ ശബ്ദം കേള്‍ക്കുന്നതോടെ സമീപവാസികളെല്ലാം ഉണര്‍ന്ന് ജാഗരൂകരാകുന്നതോടെ കള്ളന്‍മാര്‍ ഓടിരക്ഷപ്പെടും.  അല്ലെങ്കില്‍   സംഘടിതമായി നാട്ടുകാര്‍ക്ക് മോഷ്ടാക്കളെ പിടികൂടാന്‍ സാധിക്കുമെന്ന ചിന്തയാണ് പുതിയ തന്ത്രം പ്രയോഗിക്കാന്‍ അസോസിയേഷന്‍ അംഗങ്ങളെ പ്രേരിപ്പിച്ചത്. മോഷ്ടാക്കളെ ഭയന്ന് കഴിയേണ്ട അവസ്ഥയിലായ ജനങ്ങള്‍ക്ക് കൂടുതല്‍ ആത്മവിശ്വാസം നല്‍കുന്നതിനും  തസ്‌കരരെ  എളുപ്പം തുരത്തുന്നതിനും ലക്ഷ്യമിട്ടാണ് റസിഡന്‍സ് അസോസിയേഷന്‍ എല്ലാ വീട്ടുകാര്‍ക്കും പൊലിസ് വിസില്‍ നല്‍കാന്‍ തീരുമാനിച്ചത്. ഇവര്‍ ഓണാഘോഷ പരിപാടികള്‍ നടത്തിയതിനോടൊപ്പം   മോഷ്ടാക്കളെ തുരത്താനുള്ള പല വഴികളും ആലോചിച്ചു. അടുത്ത നാളില്‍  അസോസിയേഷന്റെ സമീപ പ്രദേശങ്ങളിലൊക്കെ മോഷ്ടാക്കള്‍ വീടുകളിലും മറ്റും കയറി മോഷണം നടത്തിയതോടെ ഭയപ്പാടിലായ ജനങ്ങള്‍ക്ക് ആത്മവിശ്വാസം പകരുന്നതിനും മോഷ്ടാക്കള്‍ എവിടെയെങ്കിലും എത്തിയാല്‍ സമീവാസികളെ എളുപ്പം വിവരം അറിയിക്കുന്നതിനുമായാണ് വിസില്‍ നല്‍കാന്‍ തീരുമാനിച്ചതെന്ന് അസോസിയേഷന്‍ പ്രസിഡന്റ് ഇ.പി.തോമസ് പറഞ്ഞു.