അഞ്ചരക്കണ്ടി: ബോണസ് പ്രശ്‌നം പരിഹരിക്കാത്തതില്‍ പ്രതിഷേധിച്ച് കണ്ണൂര്‍ മെഡിക്കല്‍ കോളജ് ജീവനക്കാര്‍ നടത്തിവരുന്ന അനിശ്ചിതകാല സമരം ഒത്തുതീര്‍ക്കാനായി വിളിച്ച ചര്‍ച്ച പരാജയപ്പെട്ടു. ഇന്നലെ ലേബര്‍ ഓഫിസര്‍ കെ.എം അജയകുമാറിന്റെ സാന്നിധ്യത്തിലായിരുന്നു ചര്‍ച്ച. ജില്ലയിലെ സ്വകാര്യ ആശുപത്രി മാനേജ്‌മെന്റുമായുണ്ടാക്കിയ കരാര്‍ അംഗീകരിക്കാനോ, ന്യായമായ ബോണസ് അനുവദിക്കാനോ തയാറാകാത്ത സാഹചര്യത്തിലാണ് കണ്ണൂര്‍ ജില്ലാ പ്രൈവറ്റ് ഹോസ്പിറ്റല്‍ ആന്റ് മെഡിക്കല്‍ ഷോപ്പ് എംപ്ലോയിസ് യൂനിയന്റെ(സി.ഐ.ടി.യു) ആഭിമുഖ്യത്തില്‍ സമരം തുടങ്ങിയത്. കോളജിനെ പ്രതിനിധീകരിച്ച് ഡോ. എം.എ ഹാഷിം, കെ കൃഷ്ണന്‍ എന്നിവരും തൊഴിലാളികളെ പ്രതിനിധീകരിച്ച് വി.വി ബാലകൃഷ്ണന്‍, കെ.പി സഹദേവന്‍ എന്നിവരും ചര്‍ച്ചയില്‍ പങ്കെടുത്തു. ഇന്നലത്തെ സമരം ഡി.വൈ.എഫ്.ഐ ജില്ലാ സെക്രട്ടറി വി.കെ സനോജ് ഉദ്ഘാടനം ചെയ്തു. പി.കെ ശബരീഷ്‌കുമാര്‍ അധ്യക്ഷനായി.