കാസര്‍കോട്:  ഹെല്‍മെറ്റില്ലാതെ ബൈക്കില്‍ പോകുന്ന യുവാക്കളെ പൊലിസ് ഓടിയടിക്കുന്ന ദൃശ്യം പുറത്ത്. സംഭവം വിവാദമായതോടെ ദൃശ്യം പകര്‍ത്തിയയാളെ പൊലിസ് കസ്റ്റഡിയില്‍ എടുത്തു. ഉപ്പള സ്വദേശി ഖാലിദ് എന്ന യുവാവിനെയാണ് കസ്റ്റഡിയില്‍ എടുത്തത്

ഇന്നലെ  വൈകിട്ടാണ് സംഭവം. ഹെല്‍മറ്റില്ലാതെ ബൈക്കില്‍ പോകുന്ന യുവാക്കളില്‍ പിന്നില്‍ ഇരിക്കുന്നയാളെ പൊലിസ് ഓടിവന്ന് അടിയ്ക്കുന്ന ദൃശ്യമാണ് പുറത്തായത്. എന്നാല്‍ യാത്രക്കാര്‍ ബൈക്ക് നിര്‍ത്താതെ പോകുകയായിരുന്നു.  


ഇന്നു രാവിലെ ദൃശ്യം പകര്‍ത്തിയയാളെ പൊലിസ് സ്റ്റേഷനില്‍ വിളിച്ചുവരുത്തി കസ്റ്റഡിയില്‍ എടുക്കുകയായിരുന്നു.


സംഭവത്തെ കുറിച്ച് രഹസ്യാന്വേഷണ വിഭാഗം അന്വേഷണം ആരംഭിച്ചു. ബൈക്ക് യാത്രക്കാരെ കണ്ടെത്തനുള്ള ശ്രമത്തിലാണ് പൊലിസ്.