തേഞ്ഞിപ്പലം: കുട്ടികളിലെ പഠനവൈകല്യങ്ങള്‍ രക്ഷിതാക്കളും പ്രാഥമിക വിദ്യാലയങ്ങളിലെ അധ്യാപകരും നേരത്തെ കണ്ടെത്തണമെന്നു വൈസ് ചാന്‍സലര്‍ ഡോ.കെ.മുഹമ്മദ് ബഷീര്‍ പറഞ്ഞു. പഠനവൈകല്യങ്ങളെക്കുറിച്ചുള്ള ദ്വിദിന അന്താരാഷ്ട്ര സെമിനാര്‍ കാലിക്കറ്റ് സര്‍വകലാശാലയില്‍ ഉദ്ഘാടനം ചെയ്യുകയായിരുന്നു അദ്ദേഹം.
അടിസ്ഥാന പ്രശ്‌നം വൈകല്യമാണെന്നു തിരിച്ചറിയാതെ കുട്ടികള്‍ ക്ലാസ് റൂമുകളില്‍ വികൃതികളായും പ്രശ്‌നക്കാരായും അച്ചടക്കമില്ലാത്തവരായും മുദ്രകുത്തപ്പെടുന്നുണ്ട്. ഇത്തരത്തില്‍ പാര്‍ശ്വവല്‍ക്കരിക്കപ്പെടുന്ന കുട്ടിയുടെ വിദ്യാഭ്യാസ ഭാവി അപകടത്തിലാവുകയാണു ചെയ്യുന്നത്. വൈകല്യമുള്ള കുട്ടികള്‍ക്കും മറ്റുള്ളവര്‍ക്കൊപ്പം പഠനാവസരം നല്‍കുയെന്നതാണു മികച്ച രീതി. ഇതു സാധ്യമാവണമെങ്കില്‍ അധ്യാപകര്‍ക്കു മികച്ച പരിശീലനം കിട്ടേണ്ടതുണ്ടെന്നു വൈസ് ചാന്‍സലര്‍ പറഞ്ഞു.
പഠനവൈകല്യമുള്ള വിദ്യാര്‍ഥികളെ തിരിച്ചറിയുന്നതിനു വൈദഗ്ധ്യം നേടിയ അധ്യാപകര്‍ എല്ലാ സ്‌കൂളുകളിലും ഉണ്ടാവേണ്ടതു പ്രധാനമാണെന്നു ഡോ.കെ.മുഹമ്മദ് ബഷീര്‍ പറഞ്ഞു. പഠനവൈകല്യമാണു കാരണമെന്നു തിരിച്ചറിയപ്പെടാതെ പുറത്താക്കല്‍ ഉള്‍പ്പെടെ കടുത്ത ശിക്ഷാനടപടികള്‍ക്ക് ഇരയാക്കപ്പെടുന്നവരാണു നിഷ്‌കളങ്കരായ പല കുട്ടികളുമെന്നും അദ്ദേഹം പറഞ്ഞു.
ലൈഫ്‌ലോംഗ് ലേണിംഗ് പഠനവകുപ്പ് മേധാവി ഡോ.ഇ.എം മനോജ് അധ്യക്ഷയായിരുന്നു. റീഹാബിലിറ്റേഷന്‍ കൗണ്‍സില്‍ ഓഫ് ഇന്ത്യ ദക്ഷിണമേഖലാ ചെയര്‍പേഴ്‌സന്‍ എല്‍.വി.ജയശ്രീ മുഖ്യപ്രഭാഷണം നടത്തി. സിന്‍ഡിക്കേറ്റ് അംഗങ്ങളായ കെ.വിശ്വനാഥ്, അഡ്വ.പി.എം.നിയാസ്, സൈക്കോളജി പഠനവകുപ്പ് മേധാവി ഡോ.എസ്.രാജു, ഇറാനിലെ മോണ്‍റീ മന്‍സൂരി, പി.ആര്‍.ഒ എം.വി.സക്കറിയ തുടങ്ങിയവര്‍ പ്രസംഗിച്ചു. അസീല്‍ അബ്ദുല്‍ വാഹിദ് സ്വാഗതവും ടി.പി.ഭാര്‍ഗവന്‍ നന്ദിയും പറഞ്ഞു. സെമിനാര്‍ ഇന്നു സമാപിക്കും.