മലപ്പുറം: ജനകീയ പങ്കാളിത്തത്തോടെ വിനോദസഞ്ചാര കേന്ദ്രങ്ങളെ ഉന്നത നിലവാരത്തിലേക്കുയര്‍ത്തുന്ന 'ഗ്രീന്‍ കാര്‍പ്പറ്റ്' പദ്ധതിക്കു ജില്ലയില്‍ തുടക്കമായി. സംസ്ഥാന സര്‍ക്കാരിന്റെ പുതിയ ടൂറിസം നയത്തിന്റെ ഭാഗമായി നടപ്പാക്കുന്ന പദ്ധതിയില്‍ ജില്ലയിലെ മൂന്നു ടൂറിസം കേന്ദ്രങ്ങളെയാണ് ഉള്‍പ്പെടുത്തിയിട്ടുള്ളത്. കോട്ടക്കുന്ന്, പടിഞ്ഞാറേക്കര, കരുവാരക്കുണ്ട് ചേറുമ്പ് ഇക്കോ വില്ലേജ് എന്നിവയാണു തെരഞ്ഞെടുക്കപ്പെട്ടിട്ടുള്ളത്.
വിനോദ സഞ്ചാര കേന്ദ്രങ്ങളുടെ അടിസ്ഥാന സൗകര്യവികസനം, ശുചിത്വം, സുരക്ഷ എന്നിവയാണു ഗ്രീന്‍ കാര്‍പ്പറ്റിലൂടെ പ്രധാനമായും ലക്ഷ്യമിടുന്നത്. കുടുംബശ്രീ, സാങ്കേതിക സ്ഥാപനങ്ങളിലെ എന്‍.എസ്.എസ് യൂനിറ്റുകള്‍, ക്ലബ്ബുകള്‍, സന്നദ്ധ സംഘടനകള്‍ എന്നിവരുടെ സഹകരണത്തോടെയാവും പദ്ധതികള്‍ നടപ്പാക്കുക.