.

കോഴിക്കോട്: വാറ്റ്ചാരായവും മിലിറ്ററി മദ്യവുമായി മധ്യവയസ്‌കയെ എക്‌സൈസ് പൊലിസ് പിടികൂടി. തലയാട് ഭാഗങ്ങളില്‍ നടത്തിയ പരിശോധനയിലാണ് കാന്തലാട് ആനിക്കല്‍ വീട്ടില്‍ മോളിക്കുട്ടി സ്റ്റീഫനെ(53) അറസ്റ്റ് ചെയ്തത്.മോളിക്കുട്ടിയുടെ മകനായ ജിബിന്റെ കഞ്ചാവ് വില്‍പനയെകുറിച്ച് രഹസ്യവിവരം ലഭിച്ചതിനെ തുടര്‍ന്നാണ് എക്‌സൈസ് സംഘം റെയ്ഡ് നടത്തിയത്. കഞ്ചാവ് വില്‍പനക്ക് അനുബന്ധമായും ജിബിന്റെ ഉടമസ്ഥതയിലുള്ള പന്നിഫാമിന്റെ നടത്തിപ്പിന് സഹായിക്കുന്ന സുഹൃത്തുക്കളെ സല്‍ക്കരിക്കാനുമായാണ് അനധികൃത മദ്യവില്‍പനയെന്ന് പ്രതി പൊലിസിനോട് പറഞ്ഞു.
കഞ്ചാവ് കടത്തിനും മദ്യക്കച്ചവടത്തിനുമായി ജിബിന്റെ പേരില്‍ നിരവധി കേസുകളുണ്ട്. ഒളിവില്‍പോയ ജിബിനെ രണ്ടാം പ്രതിയാക്കി എക്‌സൈസ് കേസെടുത്തു. റെയിഡിനെത്തുന്ന എക്‌സൈസ് സംഘത്തെ റോഡ്‌വീലര്‍ ഇനത്തില്‍പെട്ട വിലകൂടിയ നായ്ക്കളെ തുറന്ന് വിട്ട് ഭയപ്പെടുത്തി ഓടിക്കുകയാണ് ഇവര്‍ചെയ്തുവന്നിരുന്നത്. കൂട്ടാളികള്‍ക്ക് മദ്യവും കഞ്ചാവും നല്‍കി ഉദ്യോഗസ്ഥരെയും നാട്ടുകാരെയും ഭീഷണിപ്പെടുത്തുകയും ചെയ്തിരുന്നു. ജിബിന് വേണ്ടിയുള്ള അന്വേഷണം ഊര്‍ജിതമാക്കിയതായി എക്‌സൈസ് പൊലിസ് അറിയിച്ചു.