മുത്തങ്ങ: മുത്തങ്ങ ഫോറസ്റ്റ് ചെക്ക് പോസ്റ്റിനു സമീപം ചരക്ക് ലോറി കത്തി നശിച്ചു. ഇന്നലെ പുലര്‍ച്ചെ നാലു മണിയോടെ ചെക്ക് പോസ്റ്റിന് സമീപത്തെ പാലത്തില്‍ നിര്‍ത്തിയിട്ടിരുന്ന ബംഗ്ലൂരുവില്‍ നിന്നും കോഴിക്കേട്ടേക്ക് വന്ന ലോറിയാണ് കത്തിനശിച്ചത്.
ലോറിയുടെ പിന്‍ഭാഗത്ത് തീപടരുന്നത് ഇതുവഴിയെത്തിയ മറ്റൊരു വാഹനത്തിലെത്തയവരാണ് കണ്ടത്. ഈ സമയം തീപിടിച്ച ലോറിയില്‍ ഡ്രൈവറും രണ്ടു ജീവനക്കാരുമുണ്ടായിരുന്നെങ്കിലും വിവരമറിഞ്ഞതോടെ ഇവര്‍ പുറത്തിറങ്ങുകയായിരുന്നു. ലോറിക്ക് സമീപം പാര്‍ക്ക് ചെയ്തിരുന്ന മറ്റു വാഹനങ്ങളെല്ലാം പെട്ടെന്ന് മാറ്റിയത് അപകടം ഒഴിവാക്കി.
ബത്തേരിയില്‍ നിന്നും ഫയര്‍ഫോഴ്‌സെത്തി തീയണക്കാന്‍ ശ്രമിച്ചെങ്കിലും വാഹനം പൂര്‍ണമായും കത്തി നശിക്കുകയായാരുന്നു. തുടര്‍ന്ന് സമീപത്തെ പുഴയില്‍ നിന്നും മോട്ടോര്‍ ഉപോഗിച്ച് രണ്ട് മണിക്കൂറോളം വെള്ളം അടിച്ചാണ് തീയണച്ചത്. വാഹനം പാര്‍ക്ക് ചെയ്തിരുന്ന ഭാഗത്തുള്ള വൈദ്യുതി ലൈനില്‍ തട്ടിയാവാം തീ പടര്‍ന്നതെന്നാണ് പ്രാഥമിക നിഗമനം.
സംഭവത്തെ ദേശീയപാതയില്‍ മണക്കൂറുകളോളം ഗതാഗതം തടസ്സപെട്ടു. സ്ഥലത്തെത്തിയ പൊലിസും നാട്ടുകാരും ഇടപ്പെട്ടാണ് ഗതാഗതം പുനസ്ഥാപിച്ചത്.