വടക്കഞ്ചേരി: വര്‍ഷങ്ങളുടെ കാത്തിരിപ്പിനു ശേഷം നിര്‍മാണഘട്ടത്തിനടുത്തെത്തിയ പാലക്കുഴി ചെറുകിട ജലവൈദ്യുത പദ്ധതി നീളും. പദ്ധതിക്കായി തോടിനു കുറുകെ അണക്കെട്ട് നിര്‍മിക്കുമ്പോള്‍ എപ്പോഴും വെളളം കെട്ടിനില്‍ക്കുമെന്നതിനാല്‍ തോട് കടക്കുന്നതിനായി മുകളിലൂടെ പാലം പണിയാനായിരുന്നു തീരുമാനം. ഇതിനു പകരം അണക്കെട്ടിന്റെ മുകളിലൂടെ റോഡ് നിര്‍മിക്കാമെന്ന ടെക്‌നിക്കല്‍ കമ്മിറ്റിയുടെ നിര്‍ദേശം വന്നതാണ് പദ്ധതി നീണ്ടുപോകാന്‍ ഇടയാക്കുന്നത്.
തോടിനിരുവശത്തും കൃഷിസ്ഥലവും താമസക്കാരുമുണ്ട്. ഇരുഭാഗത്ത് നിന്നും തോട് വരെ മണ്‍റോഡുണ്ട്. തോട്ടില്‍ അധികം വെളളമില്ലാത്തതിനാല്‍ നിലവില്‍ തോടിലൂടെ തന്നെയാണ് ആളുകള്‍ കടക്കുന്നത്. വാഹനങ്ങളും തോടിലൂടെയാണ് പോകുന്നത്. അണക്കെട്ട് വരുമ്പോള്‍ ഇത് സാധിക്കാത്തതിനാല്‍ ഇരുഭാഗത്തു നിന്നുളള റോഡുമായി ബന്ധിപ്പിച്ച് പാലം പണിയാനായിരുന്നു ആദ്യ തീരുമാനം. എന്നാല്‍ ഇതിലും കുറഞ്ഞ ചെലവില്‍ പാലം നിര്‍മിക്കുന്നതിന്റെ ഏതാനം മീറ്ററുകള്‍ മാത്രം താഴെയായി വരുന്ന അണക്കെട്ടിനു മുകളിലൂടെ റോഡ് പണിയാമെന്നാണ് ടെക്‌നിക്കല്‍ കമ്മിറ്റിയുടെ കണ്ടെത്തല്‍. പുതിയ നിര്‍ദേശപ്രകാരം റോഡില്‍ നിന്ന് അണക്കെട്ട് വരെ വഴി നിര്‍മിക്കുന്നതിനായി വീണ്ടും സ്ഥലമേറ്റെടുക്കണം.
വനഭൂമിയും സ്വകാര്യ ഭൂമിയും അടുത്തത്തടുത്ത് കിടക്കുന്നതിനാല്‍ ഭൂമിയുടെ ഉടമസ്ഥാവകാശം സംബന്ധിച്ച് വ്യക്തതയും ലഭിക്കണം. ഇതിനുളള പരിശോധനകളും നടപടിക്രമങ്ങളും പൂര്‍ത്തിയാക്കാന്‍ മാസങ്ങളെടുക്കും. ഭൂമിയുടെ വില സംബന്ധിച്ചും ധാരണയിലെത്തണം.
പദ്ധതിക്കാവശ്യമായ എട്ടേക്കറോളം ഭൂമി ഏറ്റെടുത്ത് നവംബറില്‍ ടെന്‍ഡര്‍ നടത്താനുളള ഒരുക്കങ്ങള്‍ പുരോഗമിച്ചു വരികയായിരുന്നു. പുതിയ നിര്‍ദേശം വന്നതോടെ ആവശ്യമായ ഭൂമി ഏറ്റെടുക്കല്‍ പൂര്‍ത്തിയാക്കാന്‍ ചുരുങ്ങിയത് ആറുമാസമെങ്കിലും എടുക്കും. ഇതു കഴിയാതെ ടെന്‍ഡര്‍ നടത്താനാവില്ല. അണക്കെട്ടിനു മുകളിലൂടെ വാഹനങ്ങള്‍ക്ക് പോകണമെങ്കില്‍ വീതികൂട്ടണം. അണക്കെട്ടിന്റെ അടിത്തറ കൂടുതല്‍ ബലപ്പെടുത്തണം. ഇതിനായി പുതിയ എസ്റ്റിമേറ്റ് തയ്യാറാക്കണം. ഇവയെല്ലാം പൂര്‍ത്തിയാക്കാന്‍ വീണ്ടും സമയമെടുക്കും.
ഒട്ടേറെ തടസ്സങ്ങള്‍ പരിഹരിച്ച ശേഷമാണ് പദ്ധതിക്കായി നിലവില്‍ ഏട്ടേക്കറോളം ഭൂമി ഏറ്റെടുത്തിട്ടുളളത്. വീണ്ടും സ്ഥലമേറ്റെടുപ്പ് വേണ്ടിവരുന്നതോടെ പദ്ധതി അനിശ്ചിതമായി നീളുമോ എന്ന ആശങ്കയുമുണ്ട്.
ജില്ലാ പഞ്ചായത്തിന്റെ കീഴിലുളള ചെറുകിട ജലവൈദ്യുത കമ്പനിയാണ് പദ്ധതി നടപ്പാക്കുന്നത്. ജില്ലാ പഞ്ചായത്തിന്റെ രണ്ടാമത്തെ സംരംഭമാണിത്. മീന്‍വല്ലമാണ് ആദ്യത്തേത്.