മേപ്പയൂര്‍: അനധികൃത പാര്‍ക്കിങ് മൂലം ഗതാഗതക്കുരുക്കഴിയാതെ മേപ്പയൂര്‍ ടൗണ്‍. ചെറുവണ്ണൂര്‍ റോഡിന്റെ ഇരുവശത്തും വാഹനങ്ങള്‍ പാര്‍ക്ക് ചെയ്യുന്നതാണ് ഗതാഗതക്കുരുക്കിനു കാരണമാകുന്നത്.
കൊല്ലം-നെല്യാടി റോഡ്, പേരാമ്പ്ര, പയ്യോളി റോഡ്, ചെറുവണ്ണൂര്‍ റോഡ് എന്നിവിടങ്ങളില്‍ നിന്ന് വരുന്ന വാഹനങ്ങള്‍ ഇവിടെയാണ് പാര്‍ക്ക് ചെയ്യുന്നത്. എന്നാല്‍ ഇവിടെ പൊലിസ് സ്ഥാപിച്ച നോ പാര്‍ക്കിങ് ബോര്‍ഡ് നോക്കുകുത്തിയായ അവസ്ഥയിലാണ്.
മേപ്പയൂര്‍ ഗവ. ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥികള്‍ ഉള്‍പ്പെടെ കാല്‍നട യാത്രക്കാരും ഇതുമൂലം ബുദ്ധിമുട്ടനുഭവിക്കുകയാണ്. ട്രാഫിക് പൊലിസും ഇവിടെ ചില നേരങ്ങില്‍ മാത്രമാണ് പ്രത്യക്ഷപ്പെടാറുള്ളതെന്ന് നാട്ടുകാര്‍ പറയുന്നു. അനധികൃത പാര്‍ക്കിങ് അവസാനിപ്പിച്ച് ടൗണിലെ യാത്ര സുഖപ്രദമാക്കാന്‍ നടപടി സ്വീകരിക്കണമെന്ന് നാട്ടുകാരും വ്യാപാരികളും ആവശ്യപ്പെട്ടു.