ന്യൂയോര്‍ക്ക്: അമേരിക്കയിലെ ന്യൂ ജഴ്‌സിയില്‍ ട്രെയിന്‍ പാളം തെറ്റി റെയില്‍വേ സ്റ്റേഷനിലേക്കു തകര്‍ന്നു വീണു. സംഭവത്തില്‍ മൂന്നുപേര്‍ മരിക്കുകയും നൂറിലേറെ പേര്‍ക്കു പരുക്കേല്‍ക്കുകയും ചെയ്തു. പരുക്കേറ്റവരില്‍ പലരുടെയും നില ഗുരുതരമാണ്.
ന്യൂയോര്‍ക്ക് സിറ്റിക്കു കുറുകെ ഒഴുകുന്ന ഹഡ്‌സണ്‍ നദിയുടെ പടിഞ്ഞാറന്‍ കരയിലെ ഹോബോകന്‍ റെയില്‍വേ സ്റ്റേഷനില്‍ അമേരിക്കന്‍ സമയം രാവിലെയാണു സംഭവം. സ്റ്റേഷനില്‍ തിരക്കു കൂടിയ സമയത്താണ് അപകടമുണ്ടായത്. സംഭവത്തില്‍ മരണസംഖ്യ ഇനിയും കൂടാനിടയുണ്ട്.
ട്രെയിന്‍ തകര്‍ന്ന ശേഷം സ്റ്റേഷനിലെ ടിക്കറ്റ് ബാരിയറും കടന്നു സ്വീകരണ കേന്ദ്രത്തിലേക്ക് ഇടിച്ചുകയറിയതായി പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. മാന്‍ഹാട്ടനും ന്യൂജഴ്‌സിക്കുമിടയില്‍ ഏറ്റവും തിരക്കേറിയ പാതയാണിത്. അപകടത്തെ തുടര്‍ന്ന് ഹോബോകന്‍ സ്റ്റേഷന്‍ വഴിയുള്ള ട്രെയിന്‍ ഗതാഗതം നിര്‍ത്തിവച്ചു.