പത്തനംതിട്ട: ഓമല്ലൂരില്‍ ഒറ്റയ്ക്കു താമസിക്കുന്ന വൃദ്ധയുടെ വീട് കുടുംബശ്രീ പ്രവര്‍ത്തകര്‍ വൃത്തിയാക്കിയപ്പോള്‍ കിട്ടിയത് രണ്ടുലക്ഷത്തി നാല്‍പതിനായിരത്തോളം രൂപ.
ഓമല്ലൂര്‍ പൈവള്ളി ഇളവുംകണ്ടത്തില്‍ അന്നമ്മ മാമന്റെ വീട്ടില്‍ നിന്നാണ് പണം കണ്ടെത്തിയത്. ഡോളറടക്കം ഇതിലുണ്ട്. ആയിരക്കണക്കിന് രൂപ ചിതലരിച്ച നിലയിലുമാണ്. മൂന്നു മുറിയും ഒരു അടുക്കളയുമുള്ള വീട് വര്‍ഷങ്ങളായി കാടു പിടിച്ചു കിടക്കുകയായിരുന്നു.
അന്നമ്മയുടെ വീട് കാടുപിടിച്ചു കിടക്കുന്നത് തന്റെ കാര്‍ഷികവിളകള്‍ക്ക് തടസമാണെന്ന് അയല്‍വാസി പഞ്ചായത്തില്‍ അറിയിച്ചിരുന്നു.
ഇതേ തുടര്‍ന്നാണ് 22 കുടുംബശ്രീ പ്രവര്‍ത്തകര്‍ വീട് വൃത്തിയാക്കാന്‍ തുടങ്ങിയത്. വൃത്തിയാക്കിയപ്പോള്‍ വീട്ടിനുള്ളില്‍ നിന്ന മൂര്‍ഖന്‍ പാമ്പടക്കമുള്ള വിഷ ജീവികളേയും കണ്ടെത്തിയതായി കുടുംബശ്രീ പ്രവര്‍ത്തകര്‍ പറഞ്ഞു.
കട്ടിലിനടിയിലും മറ്റുമായി ചെറിയ പൊതികളിലായി സൂക്ഷിച്ച നിലയിലാണ് പണം കണ്ടെത്തിയത്.
എസ്.ബി.ടി ബാങ്കില്‍ തൂപ്പുകാരിയായി ജോലി ചെയ്യുകയായിരുന്നു അന്നമ്മ. ഭര്‍ത്താവ് പാപ്പച്ചന്‍ കാതോലിക്കറ്റ് കോളജിലെ ജീവനക്കാരനായിരുന്നു. ഭര്‍ത്താവിന്റെ മരണത്തേ തുടര്‍ന്ന് പെന്‍ഷന്‍ ഏറ്റുവാങ്ങുന്നത് അന്നമ്മയാണ്.
ഈ പെന്‍ഷന്‍ തുകയായിരിക്കാം വീട്ടില്‍ നിന്നു കണ്ടെത്തിയതെന്ന കണക്കുകൂട്ടലിലാണ് പ്രദേശവാസികള്‍.