ബംഗളുരു: കാവേരി നദീജല തര്‍ക്കത്തില്‍ കര്‍ണ്ണാടക്ക് നീതി ലഭ്യമാക്കണമെന്നാവശ്യപ്പെട്ട് മുന്‍ പ്രധാനമന്ത്രിയും ജനതാദള്‍ എസ് നേതാവുമായ എച്ച് ഡി ദേവഗൗഡ സത്യഗ്രഹം ആരംഭിച്ചു. കര്‍ണ്ണാടക നിയമസഭയായ വിധാന്‍ സൗധക്ക് മുന്നിലെ ഗാന്ധിപ്രതിമയ്ക്ക് മുന്നിലാണ് സത്യഗ്രഹം ആരംഭിച്ചത്.

സത്യഗ്രഹത്തിന് മുന്നോടിയായി വിധാന്‍ സൗധക്ക് മുന്‍പിലെ മഹാത്മ ഗാന്ധിയുടെയും ബി ആര്‍ അംബേദ്ക്കറുടെയും പ്രതിമയില്‍ ദേവഗൗഡ പുഷ്പാര്‍ച്ചന നടത്തി.

നദീജല തര്‍ക്കത്തിലെ സുപ്രീം കോടതി വിധി കര്‍ണ്ണാടകക്കുള്ള മരണ വാറണ്ടാണ് പക്ഷേ വിധിയോട് വൈകാരികമായി പ്രതികരിക്കരുതെന്നും ദേവഗൗഡ പറഞ്ഞു.

ഒക്ടോബര്‍ ആറ് വരെ സെക്കണ്ടില്‍ ആറായിരം ഘനയടി വെള്ളം തമിഴ് നാടിന് നല്‍കണമെന്ന് കര്‍ണാടയ്ക്ക് സുപ്രിംകോടതി അന്ത്യശാസനം നല്‍കിയിരുന്നു.

അതിനിടെ പ്രശ്‌നം ചര്‍ച്ച ചെയ്യാന്‍ കര്‍ണാടക മുഖ്യമന്ത്രി സിദ്ധരാമയ്യയുടെ നേതൃത്വത്തില്‍ ഇന്ന് സര്‍വ്വകക്ഷിയോഗം ചേരുന്നുണ്ട്.