കൊടുവള്ളി: കോണ്‍ഗ്രസ് കിഴക്കോത്ത് മണ്ഡലം കമ്മിറ്റി സംഘടിപ്പിക്കുന്ന മഹാത്മജി അനുസ്മരണം പന്നൂര്‍ കുറ്റ്യേങ്ങ് വയല്‍ എല്‍.പി സ്‌കൂള്‍ ചിനിയത്ത് വേലായുധന്‍ നഗറില്‍ ഇന്ന് വൈകുന്നേരം 3 മണിക്ക് കുന്ദമംഗലം ബ്ലോക്ക് പഞ്ചായത്ത് പ്രസിഡന്റ് രമ്യ ഹരിദാസ് ഉദ്ഘാടനം ചെയ്യുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. ഡി.സി.സി സെക്രട്ടറിമാരായ ഐ.പി.രാജേഷ്, നിജേഷ് അരവിന്ദ് സംസാരിക്കും.
മുതിര്‍ന്ന കോണ്‍ഗ്രസ് നേതാക്കളെ യൂത്ത് കോണ്‍ഗ്രസ് നിയോജക മണ്ഡലം പ്രസിഡന്റ് സി.കെ. ജലീല്‍ ആദരിക്കും. ജില്ലാ കോണ്‍ഗ്രസ് കമ്മിറ്റിയുടേയും യൂത്ത് കോണ്‍ഗ്രസ് പാര്‍ലമെന്റ്-നിയോജക മണ്ഡലം കമ്മിറ്റികളുടേയും അറിവോടെയും പങ്കാളിത്തത്തോടെയുമാണ് പരിപാടിയെന്നും ഇതുമായി ബന്ധപ്പെട്ട് മണ്ഡലം കമ്മിറ്റിയിലെ ചില ഭാരവാഹികള്‍ മാധ്യമങ്ങള്‍ക്ക് നല്‍കിയ വാര്‍ത്ത അടിസ്ഥാനരഹിതമാണെന്നും ഭാരവാഹികള്‍ വ്യക്തമാക്കി.
പാര്‍ട്ടി പ്രവര്‍ത്തകര്‍ക്കിടയില്‍ ആശയക്കുഴപ്പമുണ്ടണ്ടാക്കാന്‍ ശ്രമിച്ച ടി.എം.രാധാകൃഷ്ണന്‍, എം.എം.വിജയകുമാര്‍, ഗഫൂര്‍ മൂത്തേടത്ത്, പുളിയാറ അബൂബക്കര്‍, കെ.പി.വിനോദ്, മുഹമ്മദ് ഹാജി എന്നിവര്‍ക്കെതിരേ കെ.പി.സി.സി, ഡി.സി.സി പ്രസിഡന്റുമാര്‍ക്ക് പരാതി നല്‍കാന്‍ തീരുമാനിച്ചതായും ഭാരവാഹികള്‍ പറഞ്ഞു. വാര്‍ത്താ സമ്മേളനത്തില്‍ സി.കെ.ജലീല്‍, ഷാജിര്‍ കാന്തപുരം, എം.പി.മുഹമ്മദ് അസ്‌ലം, ജൗഹര്‍ ആവിലോറ, എന്‍.കെ.അബ്ദുല്‍ബാരി, പി.ഫാസില്‍ പങ്കെടുത്തു.