കണ്ണൂര്‍: കണ്ണൂര്‍ പൊലിസ് പരേഡ് ഗ്രൗണ്ടില്‍ നടന്ന 41-ാമത് പൊലിസ് അത്‌ലറ്റിക് മീറ്റില്‍ കണ്ണൂര്‍ എ.ആര്‍ ക്യാംപ് കിരീടം ചൂടി. 25 ഇനങ്ങളിലായി നടന്ന മത്സരത്തില്‍ 107 പോയിന്റോടെയാണ് എ.ആര്‍ ക്യാംപ് ഒന്നാം സ്ഥാനത്തെത്തിയത്. കണ്ണൂര്‍ സബ് ഡിവിഷന്‍ 94 പോയിന്റോടെ രണ്ടാം സ്ഥാനത്തും 56 പോയിന്റു നേടി തളിപ്പറമ്പ് സബ് ഡിവിഷന്‍ മൂന്നാം സ്ഥാനവും കരസ്ഥമാക്കി. വിജയികള്‍ക്ക് കണ്ണൂര്‍ റെയ്ഞ്ച് ഐ.ജി ദിനേന്ദ്ര കശ്യപ് ട്രോഫികള്‍ വിതരണം ചെയ്തു. ജില്ലാ പൊലിസ് മേധാവി കോറി സഞ്ജയ്കുമാര്‍ ഗുരുദിന്‍ പങ്കെടുത്തു. മീറ്റിന്റെ ഭാഗമായി രാവിലെ ആറിന് പൊതുജനങ്ങളെ പങ്കെടുപ്പിച്ചുകൊണ്ടുള്ള ക്രോസ് കണ്‍ട്രി മല്‍സരം നടന്നു. അലവിലില്‍ നിന്നാരംഭിച്ച മത്സരം നഗരം ചുറ്റി പരേഡ് ഗ്രൗണ്ടില്‍ സമാപിച്ചു.