വാടാനപ്പള്ളി: സേവനം ജീവിതത്തിന്റെ ഭാഗമാക്കാന്‍ കഴിയണമെന്നും നവമാധ്യമങ്ങളുടെ സ്വാധീന വലയത്തില്‍ നിന്നും യുവതലമുറയെ കാരുണ്യ പ്രവര്‍ത്തനങ്ങളിലേക്ക് കൂട്ടുവാനുള്ള കേന്ദ്രീകൃത പ്രവര്‍ത്തനങ്ങള്‍ സമൂഹം ഏറ്റെടുക്കണമെന്നും സമസ്ത കേരള മാനേജ്‌മെന്റ് അസോസിയേഷന്‍ ജില്ലാ ജനറല്‍ സെക്രട്ടറി സി.എ മുഹമ്മദ് റഷീദ് അഭിപ്രായപ്പെട്ടു. തൃത്തല്ലൂര്‍ വെസ്റ്റ് മുഹമ്മദിയ്യ മദ്രസയില്‍ സഹചാരി സെന്റര്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. വേദനിക്കുന്ന മനസ്സുകള്‍ക്ക് സാന്ത്വനം പകരാന്‍ കഴിയും വിധമുള്ള ഒരു പഠനക്രമം നടപ്പില്‍ വരുത്തേണ്ടത് കാലഘട്ടത്തിന്റെ അനിവാര്യതയാണെന്നും അദ്ദേഹം പറഞ്ഞു. വാടാനപ്പള്ളി റെയ്ഞ്ച് ചെയര്‍മാന്‍ എ.എ ജാഫര്‍ മാസ്റ്റര്‍ അധ്യക്ഷനായി. ഡോക്ടര്‍ എന്‍.എ മാഹിന്‍ മുഖ്യാതിഥിയായിരുന്നു. ദേശിയ അധ്യാപക അവാര്‍ഡ് ജേതാവ് കെ.എസ് ദീപന്‍ മാസ്റ്ററെ ചടങ്ങില്‍ ആദരിച്ചു. ജില്ലാ കൗണ്‍സിലര്‍ ഇ.എച്ച് കബീര്‍ ബാഖവി വിഖായാദിന സന്ദേശം നല്‍കി. വി.എച്ച് ആഷിഖ്, സജീഷ് ചാളിപ്പാട്ട്, ആര്‍.എസ് നസീര്‍, സി.വി സുധാകരന്‍, എ.എ ജാബിര്‍, എ.ഐ മുഹമ്മദ് സാബിര്‍, എ.കെ അലിമുസ്‌ലിയാര്‍, സി.എം ഷിഹാബുദ്ദീന്‍ മൗലവി, അബൂബക്കര്‍ സിദ്ദീഖ് മുസ്‌ലിയാര്‍ എന്നിവര്‍ പ്രസംഗിച്ചു.